काठमाडौँ — महिला, बालबालिका, लैङ्गिक तथा यौनिक अल्पसंख्यक र सामाजिक सुरक्षा मन्त्रालयले मन्त्रालयमा आउने सेवाग्राहीको सहजता र पहुँच सुनिश्चित गर्न आजदेखि व्हीलचेयर सेवा सञ्चालनमा ल्याएको छ । 

शारीरिक रूपमा हिँडडुल गर्न कठिनाइ भएका व्यक्ति, अपाङ्गता भएका व्यक्ति, ज्येष्ठ नागरिक तथा आवश्यकता अनुसार अन्य सेवाग्राहीलाई लक्षित गर्दै मन्त्रालयको सम्पूर्ण परिसरमा व्हीलचेयर सेवा उपलब्ध गराइएको हो । 

मन्त्रालयमा सेवा लिन आउने नागरिकलाई सहज, सुरक्षित र सम्मानजनक वातावरण प्रदान गर्ने उद्देश्यले सुरु गरिएको यस सेवाले सार्वजनिक सेवा प्रवाहलाई थप पहुँचयुक्त, समावेशी र नागरिकमैत्री बनाउने अपेक्षा गरिएको मन्त्रालयले जनाएको छ । मन्त्रालयका प्रवत्ता चक्र बहादुर बुढाले मन्त्रालयमा कामको सिलसिलामा आउने सेवाग्राहीहरुलाई लक्षित गरेर व्हीलचेयर सेवाको सुरुवात गरेको बताए ।