बुढो र अशक्त बाघलाई निकुञ्जको खोरमा राख्ने गरिएको छ।
चितवन — गाउँतिर आउने गरेको बाघलाई चितवन राष्ट्रिय निकुञ्जको टोलीले नियन्त्रणमा लिएको छ । मंगलबार साँझ माडीबाट नियन्त्रणमा लिएपछि सौराहामा रहेको खोरमा राखेको चितवन राष्ट्रिय निकुञ्जका सूचना अधिकारी रहेका संरक्षण अधिकृत अविनास थापा मगरले बताए ।
'अन्दाजी १२/१३ वर्षको बुढो र अशक्त पोथी बाघ हो । माडी नगरपालिका-१ लक्ष्मनिया बस्तीमा दुई/चार दिनयता गाई बाच्छालाई आक्रमण गर्ने गरेको बाघलाई नियन्त्रणमा लिएका हौँ,' सूचना अधिकारी अविनास थापा मगरले भने ।
चितवन राष्ट्रिय निकुञ्ज नेपालमा बाघको मुख्य बासस्थल हो । स्वस्थ भए जंगलमै छाडे पनि बुढो र अशक्त बाघलाई खोरमा राख्ने गरिन्छ ।
निकुञ्ज मुख्यालय कसराको खोरमा यस्ता दुईवटा बाघ छन् । सौराहाको खोरमा पनि यसअघि नै एउटा बाघ थियो । मंगलबारदेखि दुईवटा भएको सूचना अधिकारी थापा मगरले बताए ।
