काठमाडौँ — यस वर्षको प्रि-मनसुनमा तथ्यांक राख्न थालिएको ४५ वर्षयताकै सबैभन्दा धेरै पानी परेको छ । प्रि-मनसुन अवधिमा नेपालमा औसत २२६.३ मिलिमिटर पानी पर्ने गर्छ । यस वर्ष भने औसतको १४५.५ प्रतिशत अर्थात् ३३९.७ मिलिमिटर पानी परेको जल तथा मौसम विज्ञान विभागले जनाएको छ । 

यसअघि सन् १९९० को प्रि-मनसुनमा औसतभन्दा धेरै ३३१.४० मिमि पानी परेको थियो । अहिलेको वर्षाले सो रेकर्डलाई पनि तोडेको छ । विभागले सन् १९८१ देखि १२६ वटा वर्षा मापन केन्द्रको तथ्यांकलाई आधार मानी प्रि-मनसुनको विश्लेषण गर्दै आएको छ । 

१ मार्चदेखि ३१ मेसम्म (१५ फागुन-१५ जेठ) को अवधिलाई प्रि-मनसुन भनिन्छ । यसअघि सन् १९९० मा ३३१.४० मिमि, २००० मा ३२३.१९, २०२१ मा ३१७.८८ र २०२० मा ३१५.७८ मिमि वर्षा प्रि-मनसुन अवधिमा मापन गरिएको विभागले जनाएको छ ।