इरानी सञ्चारमाध्यमहरूका अनुसार केश्म द्वीप, बन्दर अब्बास, मिनाब र सिरिक क्षेत्रमा विस्फोटका आवाज सुनिएका छन्। त्यसको प्रत्युत्तरमा इरानले कुवेत र बहराइनस्थित अमेरिकी सैन्य अड्डालाई निशाना बनाएको दाबी गरेको छ। यद्यपि सम्भावित क्षतिको विवरण सार्वजनिक भएको छैन।

यसैबीच जोर्डनले इरानबाट प्रहार गरिएका पाँचवटा मिसाइल आकाशमै खसालिएको जनाएको छ। इरानी समाचार संस्था तस्निमले दक्षिणी इरानको जाम क्षेत्रमा अमेरिकी एमक्यू–९ रिपर ड्रोन खसालिएको दाबी गरेको छ, तर अमेरिकाले त्यसको पुष्टि गरेको छैन।

तनाव बढिरहेका बेला रूसले अमेरिका र इरानलाई सैन्य कारबाही रोक्न र कूटनीतिक संवादमा फर्किन आग्रह गरेको छ। क्षेत्रीय तनाव कम गर्ने प्रयासस्वरूप कतारले आफ्नो प्रतिनिधिमण्डल तेहरान पठाएको बताइएको छ।