काठमाडौं — प्रतिनिधिसभाका सांसदहरूले असार आउन लागिसके पनि कृषि क्षेत्रका समस्या समाधान नभएको भन्दै सरकारको ध्यानाकर्षण गराएका छन् ।

प्रतिनिधिसभाको आजको बैठकको शून्य समयमा सांसद सन्दीप रानाले किसानले धानको ब्याड राख्ने बेला भइसक्दा पनि सिंचाइ योजना अलपत्र भएको बताए । सुरु गरिएका सिंचाइ योजना शीघ्र सम्पन्न गरिनुपर्नेमा उनले जोड दिए । कृषिलाई निर्वाहमुखी मात्र नभई निर्यातमुखी बनाउने गरी बजेट व्यवस्था गर्न सांसद रानाले माग गरे । 

सांसद समिना मियाँले विद्युतीय चुरोट भेपको टक्सिनले मानसिक स्वास्थ्यमा असर गर्ने भएकाले यसको अवैध आयातमा रोक लगाउन माग गरे । सांसद समीक्षा बाँस्कोटाले भारतमा चिया निर्यात गर्नका लागि सरकारले पहल गर्नुपर्नेमा जोड दिए । उनले चिया निर्यातको दीर्घकालीन समस्या समाधानका लागि पहल गर्न माग गरे ।  

सांसद सरस्वती लामाले धादिङबाट रसुवा जाने सडकका साथै धादिङका विभिन्न स्थानका सडकको समस्या समाधान गर्न सरकारको ध्यानाकर्षण गराइन । सांसद सरिता महतोले अटिजम, डाउन सिन्ड्रोमलगायत समस्या भएका बालबालिकाको समस्यातर्फ गम्भीर बन्न सरकारसँग माग गरे । 

सांसद सागर भुसालले कालीगण्डकी जलाशय योजना छिटो सुरु गर्न माग गरे र सुन्तला उत्पादनमा अग्रणी पर्वतलाई पकेट क्षेत्र घोषणा गर्न माग गर्दै उनले पर्वतका धार्मिक, साँस्कृतिक स्थलमा पर्यटन प्रवर्द्धन गर्न पूर्वाधार विकास गरिनुपर्ने बताए । 

सांसद साजिदा खातुत सिद्धिकीले दाङको टरिगाउँ क्षेत्रको सडकको समस्या समाधान गर्न माग गरे । सांसद सीताराम साहले डिजिटल नेपालको नीतिमा अघि बढिरहँदा टेलिफोन सेवा भरपर्दो बनाउन माग गरे । सांसद सिर्जना श्रेष्ठले सुनसरीका अव्यवस्थित बसोबासीका समस्या समाधान गर्नुपर्नेमा जोड दिए ।