उपभोक्ताहरूका भान्सामा दैनिक उपभोग गर्ने चामल लगायतका खाद्यान्न तथा अन्य उपभोग्य वस्तुमा अत्यधिक विषादी प्रयोग भएको दाबीसहित त्यसलाई रोक्न माग गर्दै उपभोक्ता अदालतमा उक्त मुद्दा पेस भएको थियो ।
काठमाडौँ — चामल लगायतका खाद्यान्नमा अत्याधिक विषादी भएको दाबीसहित उपभोक्ता अदालतमा पेस भएको मुद्दा दर्ता गर्न अस्वीकार भएको छ ।
उपभोक्ता अदालतका श्रेस्तेदार शिशिर लामिछानेले दुई दिनअघि पेस भएको मुद्दा दरपीठ(दर्ता नगर्ने) आदेश गरेका हुन् । उपभाेक्ता हित संरक्षण मञ्चका तर्फबाट वरिष्ठ अधिवक्ता विष्णुप्रसाद तिमल्सिनाले मुद्दा पेस गरेका थिए ।
उपभोक्ताहरूका भान्सामा दैनिक उपभोग गर्ने चामल लगायतका खाद्यान्न तथा अन्य उपभोग्य वस्तुमा अत्यधिक विषादी प्रयोग भएको दाबीसहित त्यसलाई रोक्न माग गर्दै उपभोक्ता अदालतमा उक्त मुद्दा पेस भएको थियो ।
उपभोक्ता अदालत गठन भएपछिका एक वर्षमा उपभोक्ताले आफूलाई हानीनोक्सानी परेको विषयमा व्यक्तिगत रुपमा मुद्दा मामिला गरेका थिए । तर, उपभोक्ताहरूलाई सामूहिक रुपमा नै हानी भएको दाबीसहित उपभोक्ता अदालतमा मुद्दा परेको यो पहिलो मुद्दा हो ।
सेवा प्रदायकको गल्ती र त्यसमा नियामक निकायको कमजोर नियमनले चामल उपभोक्ता गर्ने समग्र उपभोक्ताको स्वास्थ्यमा असर परेको भन्दै निवेदनमा सामूहिक दुस्कृति(मास टर्ट)को सिद्धान्त अनुसार कारबाहीको माग गरिएको थियो । मुद्दामा नेपालमा चामल आयात गर्दा विषादी परीक्षण गरेको भए कागजात पेस गर्न लगाउन आदेशको पनि माग गरिएको थियो । स्थानीय तहहरूले खाद्यान्न निरीक्षण अधिकृतको व्यवस्था गर्नुपर्नेमा त्यसो नगरेको भन्दै काठमाडौं उपत्यकाका स्थानीय तहलाई चामलमा विषादी प्रयोगका बारेमा नमुना संकलन र जाँच गरी निरीक्षण प्रतिवेदन पेस गर्न लगाउन आदेश माग गरिएको थियो ।
अदालतले दर्ता गर्न अस्वीकार गरेको आदेश प्राप्त भएपछि इजलासमा निवेदन दिने वरिष्ठ अधिवक्ता तिमल्सिनाले बताए ।
