गुम्बाका अध्यक्ष कपुरे तामाङले भने- 'कम्तीमा बुद्ध जयन्तीका दिन नभत्काउनु भनेर आग्रह गरेका थियौं, भन्दाभन्दै डोजर चलाए, बुद्धको मूर्ति लथालिङ्ग छ ।'
काठमाडौँ — सुकुमवासी बस्ती हटाउने क्रममा सरकारले बल्खुस्थित साङ्गे छोइलिङ्ग गुम्बा पनि भत्काएको छ । सुकुमवासी बस्तीको बीचमा रहेको गुम्बामा शुक्रबार बिहान डोजर चलाइएको हो ।
'कम्तीमा बुद्ध जयन्तीका दिन नभत्काउनु भनेर आग्रह गरेका थियौं, भन्दाभन्दै डोजर चलाए, बुद्धको मूर्ति यसरी लथालिङ्ग छ,' गुम्बाका अध्यक्ष कपुरे तामाङले कान्तिपुरसँग भने । गुम्बा २०७८ कात्तिक १३ गते दर्ता भएको उनले बताए ।
बस्तीकै बीचमा रहेको साझा पेट्रोल पम्प जोगाएर अन्य टहरा भत्काइएको छ ।
काठमाडौंका खोला किनारका 'अव्यवस्थित बस्ती हटाउने' क्रममा सरकारले शुक्रबार बिहानै बल्खु र टेकु नजिक पर्ने वंशीघाट क्षेत्रमा डोजर चलाएको हो ।
बुधबार काठमाडौं जिल्ला प्रशासन कार्यालयले आजसम्मको सूचना दिएर बस्ती खाली गराउन भनेको थियो। उक्त सूचनापछि धेरैले आफैं घरटहरा खाली गर्न थालेका थिए ।
यसअघि जस्तै बाक्लो सुरक्षा घेराबीच डोजर चलाएर बस्तीहरू भत्काउन थालिएको हो । घटनास्थलमा नेपाल प्रहरी, सशस्त्र प्रहरी, नगर प्रहरी लगायत खटिएका छन् ।
