काठमाडौँ — सरकारले सुकुमवासी बस्ती हटाउने भएपछि त्यसको सुकुमवासीहरू विरोधमा उत्रिएका छन् । आज बिहानैदेखि उनीहरुले सरकारको निर्णयको विरोध गर्दै थापाथलीमा प्रदर्शन गरेका छन् ।

डोजर आतंक बन्द गर्नुपर्ने भन्दै उनीहरुले आवासको हक सुनश्चित गर्न आग्रह गरेका छन् । उनीहरुलाई साथ दिन केही जेनजी अभियता र सरोकारवाला थापाथली पुगेका छन् ।

बस्ती खाली गराउने भएपछि केहीले भने आफ्नो टहरोका सामानहरु लोड गरेर सारिरहेका छन् । केही अन्योलमा छन् भने धेरै त्रसित अवस्थामा छन् ।

बस्तीमा यतिबेला बेग्लै दृश्य देखिएको छ । कोही सामान मिलाउँदै छन् भने कोही यहीँ खाना पकाउने तयारीमा देखिन्छन् । 'कतिजना डेरा खोज्न हिँड्नुभएको छ, धेरैको लथालिंग अवस्था छ,' पीडित रेनु राईले भनिन्, 'हामीले त कोठा पनि पाएका छैनौं । हामीमाथि सरकारको यो ज्यादती हो ।'