काठमाडौँ — प्रधानमन्त्री तथा मन्त्रिपरिषद्को कार्यालयले सम्पत्ति शुद्धीकरण विभागका महानिर्देशकसहित अर्थ मन्त्रालय र अन्तर्गतका २० जना सहसचिवहरुलाई सरुवा गरेको छ । 

विभागका महानिर्देशक गजेन्द्र ठाकुरलाई भने अर्थमन्त्रालले फिर्ता बोलाएको छ । मन्त्रिपरिषद्को बिहीबारको निर्णयअनुसार संघीय मामिला तथा सामान्य प्रशासन मन्त्रालयले सार्वजनिक गरेको सूचीअनुसार सरुवा भएकामध्ये २० जना सहसचिवलाई प्रदेश पठाइएको छ । 

पछिल्लो समय यति ठूलो संख्यामा सहसचिवहरुलाई प्रदेश पठाएको सम्भवतः यो पहिलो पटक हो । सरुवा हुनेमा अर्थ मन्त्रालय र अन्तर्गत लामो समय बसेका र प्रमुख जिल्ला अधिकारीहरुसमेत रहेका छन् । सहसचिवहरु प्रदेश नगाएको आवाज उठिरहेका बेला उनीहरुलाई सरुवा गरिएको हो । 

पाँच जनालाई मधेश, पाँच जना लुम्बिनी, चार जना बागमती, दुई जना कोशी, दुई जना गण्डकी, एक जना कर्णाली र एक जनालाई सुदूरपश्चिम प्रदेश सरुवा गरिएको छ । झकराम अधिकारी र लोकबहादुर सुनारलाई संघीय मन्त्रालयको अतिरिक्त समूहमा राखिएको छ । 

अर्थ मन्त्रालयअन्तर्गतका महेश बराल, सेवन्त पोखरेल, मदन दहाल, महेश भट्टराईलाई प्रदेश सरुवा गरिएको छ । उनीहरु चारै जना अर्थ मन्त्रालय र अन्तर्गत थिए । दाहाल आन्तरिक राजस्व विभागका महानिर्देशक थिए । उनलाई १४ महिनापछि सुदूरपश्चिम प्रदेशमा सरुवा गरिएको छ । पोखरेल र भट्टराईलाई अर्थले बजेट बनाउने टिममा राखेको थियो । उनीहरु दुवै जना अर्थका 'क्याडर’ मानिन्छन् । उनीहरुले लामो समय भन्सार/राजस्व प्रशासनमा रहेर काम गरेका छन् । 

संघीय मन्त्रालयमा रहेकी पार्वती शर्मालाई मधेश प्रदेश पठाइएको छ । उनी संघीय मन्त्रालयको प्रशासन महाशाखा प्रमुख थिइन् । भक्तपुरका प्रमुख जिल्ला अधिकारी उमेश ढकाललाई बागमती प्रदेश पठाइएको छ । अनिता निरौला र नारायणप्रसाद मैनालीलाई बागमती प्रदेश पठाइएको छ । ओमराज ढुंगाना र होमराज पौडेललाई मधेश प्रदेश पठाइएको छ ।

संघीय मन्त्रालयकी निता पोखरेल अर्याल र अर्थकी सुशीला अर्याल, राम पराजुली र नारायणप्रसाद अर्याललाई लुम्बिनी प्रदेश सरुवा गरिएको छ । रोशनीकुमारी श्रेष्ठलाई कार्णाली प्रदेश सरुवा गरिएको छ भने कर्णालीका धोलकराज ढकाललाई संघीय मन्त्रालय ल्याइएको छ । विष्णुप्रसाद कोइराला र रामकृष्ण अधिकारीलाई कोशी प्रदेश पठाइएको छ । सरुवा भएका धेरै सहसचिवहरु लामो समयदेखि सुगम क्षेत्रमा बसेकाले प्रदेश पठाइएको स्रोतले बतायो । 

शुद्धीकरणका महानिर्देशक फिर्ता किन ? 

सम्पत्ति शुद्धीकरणमा छानबिनमा रहेको दिपक भट्ट र साहिल अग्रवालसँग कनेक्सन रहेको आरोपमा महानिर्देशक गजेन्द्रलाई तत्कालका लागि मन्त्रालय फिर्ता बोलाइएको हो । हिमालय रिइन्स्योरेन्समा भट्ट, साहिल, सुलभ र शेखर गोल्छालगायतका समूहको लागानी रहेको छ । उक्त रिइन्स्योरेन्समा महानिर्देशक ठाकुरकी श्रीमती निहारिका ठाकुरको नाममा २० हजार कित्ता शेयर लिएको देखिएपछि गजेन्द्र विवादमा तानिएका हुन् । त्यसैले उनलाई सम्पत्ति शुद्धीकरणमा राख्न उचित नदेखिएकाले मन्त्रालय तानेको स्रोतले बतायो ।