पर्सा — दुई दशकदेखि वीरगन्जको सीमावर्ती भारतीय सहर रक्सौलस्थित रेलवे स्टेसनको यार्डबाट बन्द रहेको नेपालतर्फको कार्गो ह्यान्डलिङ सेवा बुधबारदेखि पुनः सुरु भएको छ । भारतीय रेलवेको भगिनी संस्था कोंकरले सोमबारदेखि उक्त सेवा नेपालका लागि पुनः सञ्चालनमा ल्याएको हो । 

पर्सा बारा औद्योगिक करिडोरस्थित जगदम्बा इन्टरप्राइजेजले भारतको झारखण्डस्थित जमशेदपुर टाटानगरबाट आयात गरेको ९० कन्टेनर स्पन्ज आइरन कोंकरले सोझै रक्सौलस्थित रेलवे स्टेसनको यार्डबाटै हस्तान्तरण गरेको हो । कोंकरले आफ्नै रेलवे र्‍याक र कन्टेनरबाट उक्त ढुवानी सेवा दिएर सोझै रक्सौल रेलवे स्टेसनमा आयातित वस्तु सम्बन्धित आयातकर्तालाई जिम्मा लगाएको कोंकरका अधिकृत विष्णुकान्त चौधरीले जनाए । 

भारतीय रेलवे स्टेसनमै नेपाली आयातकर्तालाई जिम्मा लगाइने वस्तु मालवाहक ट्रकबाट ढुवानी गरेर नेपाल भन्सार बिन्दुमा प्रवेश गर्न रक्सौलस्थित भारतीय एकीकृत सुरक्षा जाँच चौकी (ल्यान्ड पोर्ट अथोरिटी) मा ग्रिन च्यानलका लागि ४ नम्बरको डेडिकेटेड लेन (बाटो र ढोका) उपलब्ध गराइएको छ । 

उक्त ट्रक वीरगन्जस्थित एकीकृत सुरक्षा जाँच चौकीमा प्रवेश गर्न चौकीको १० नम्बर लेन उपलब्ध गराइएको छ । यो डेडिकेटेड लेनबाट भारतीय रेलवे स्टेसनमा नेपाली पक्षले बुझेको आफ्नो मालवस्तु नेपाल ल्याउन सहज र छरितो मार्ग पाएका छन् । अन्य मालवाहक सवारी जस्तो यी सवारीले घण्टौं लाममा बस्नुपर्दैन । जसले गर्दा नेपाली आयातकर्ताले भारतबाट सोझै नेपाली भन्सार बिन्दुमा प्रवेश पाउने र आफ्नो मालवस्तु छिटो पाएर सक्दो छिटो कन्टेनर भारतीय रेलवेलाई फिर्ता पठाउँदा भारतीय रेलवे र सिपिङ लाइन कम्पनीहरूलाई तिर्नुपर्ने अतिरिक्त शुल्क पनि जोगिनेछ । 

भारत तथा तेस्रो मुलुकबाट नेपाली आयातकर्ताले आयात गर्ने मालवस्तु सहज रूपमा नेपाल भित्रिने र ढुवानी लागत मूल्य पनि कम हुन जाने भएकाले नेपाली आयातकर्ताले थप राहत पाउने वीरगन्ज उद्योग वाणिज्य संघका अध्यक्ष हरि गौतम बताउँछन् । ‘यो स्वागतयोग्य काम हो,’ उनले भने, ‘सक्दो छिटो आफ्नो मालवस्तु जाँचपास गराएर कन्टेनर फिर्ता गर्न पाउँदा नेपाली आयातकर्तालाई धेरै राहत मिल्छ ।’