काठमाडौँ — विश्वभरका फोटो पत्रकारहरूबीच सबैभन्दा प्रतिष्ठित 'वर्ल्ड प्रेस फोटो' अवार्डमा यस वर्ष नेपालका नरेन्द्र श्रेष्ठले ऐतिहासिक सफलता हात पारेका छन् । 

सन् १९५५ मा नेदरल्याण्डबाट सुरु भएको यो प्रतियोगिताको ७१ औं वर्षमा यस वर्ष श्रेष्ठले वेस्ट, सेन्ट्रल एण्ड साउथ एसिया क्षेत्रबाट 'सिंगल' क्याटेगोरीमा अवार्ड जितेका हुन् । श्रेष्ठको गत भदौ २४ मा जेन-जी प्रदर्शनका बेला आगजनीपछि जल्दै गरेको नेपालको मुख्य प्रशासनिक भवन, सिंहदरबारको तस्बिरले वर्ल्ड प्रेस फोटो-०२६ को वेस्ट, सेन्ट्रल एण्ड साउथ एसिया क्षेत्रबाट 'सिंगल' क्याटेगोरीमा प्रथम स्थान हासिल गरेको हो ।

३७ सयभन्दा बढी फोटोग्राफरबीचको प्रतिस्पर्धा यस वर्षको प्रतियोगितामा विश्वका १४१ देशका ३ हजार ७ सय ४७ जना फोटोग्राफरहरूले सहभागिता जनाएका थिए । कूल ५७ हजार ३७६ तस्बिरहरूमध्येबाट श्रेष्ठको तस्बिर उत्कृष्ट ठहरिएको हो । 

आफ्नो २५ वर्ष लामो करियरमा यसलाई उनी सबैभन्दा ठूलो सपना पूरा भएको क्षण मान्छन् । हुलाकबाट सुरु भएको यात्रा आफ्नो करियरको सुरुवात कान्तिपुर पब्लिकेसन्सबाटै गरेका श्रेष्ठ पुराना दिन सम्झँदै भन्छन्, 'सन् २००० तिर हामी १०-१२ जना फोटोग्राफरहरू मिलेर हुलाकमार्फत फोटो पठाउँथ्यौँ । त्यतिबेला अवार्ड जित्ने लक्ष्यभन्दा पनि सहभागी भएबापत पाइने 'वर्ल्ड प्रेस फोटो'को वार्षिक पुस्तक (बुक) पाउनु नै हाम्रा लागि ठूलो कुरा हुन्थ्यो ।'

नेपालका ठूला राजनीतिक परिवर्तन र प्राकृतिक विपत्तिका तस्बिरहरूले यसअघि पनि 'वर्ल्ड प्रेस फोटो'मा स्थान नपाएका भने होइनन् ।