वैदेशिक रोजगारीको सिलसिलामा १४ महिनाअघि कुवेत पुगेकी ४१ वर्षीया कोपिला अधिकारीको मृत्युले परिवारमा बज्रपात भएको छ ।
What you should know
उदयपुर — विदेश गएर कमाउने र फर्केर परिवारसँग रमाउने सपना सबैको हुन्छ । तर यस्तो अवसर सबैलाई मिल्दैन । कतिपयको बीचमै सपनामात्र टुट्दैन, ज्यानै गुम्छ । यता परिवार र आफन्तमा बज्रपात हुन्छ ।
उदयपुरको बेलका नगरपालिका–३ माइतीभई पूर्वी नवलपरासीको विनयी त्रिवेणी गाउँपालिका घरभएकी कोपिला अधिकारी (थामी)को परिवारमा यस्तै घटना भएको छ । वैदेशिक रोजगारीको सिलसिलामा १४ महिनाअघि कुवेत पुगेकी ४१ वर्षीया कोपिलाको मृत्युले परिवारमा बज्रपात भएको छ । उनका दुई छोरा र तीन छोरी टुहुरा बन्न पुगेका छन् ।
भाई मानव अधिकारीका अनुसार एक महिनाअघि मृत्यु भएकी उनको बुधबार मात्र नेपालमा शव आइपुगेर परिवारले अन्तिम संस्कार गरिएको छ । त्यहाँ एक विद्यालयको क्यान्टिनमा कामदार रहेकी उनको हृदयघात भएर मृत्यु भएको खबर आएको थियो ।
खासगरी इरान–अमेरिका, इजरायल युद्धको क्रममा विद्यालयनजिकै विष्फोट भएका कारणले एक्कासी स्वासप्रश्वासमा समस्या भई अस्पताल भर्ना भएकी उनी निको भइनन् । भोलिपल्ट नै अस्पतालले मृत घोषणा गरेको जानकारी आएको भाई मानवले बताए ।
उनकै आश्रयमा श्रीमान् र छोराछोरी काठमाडौंमा डेरा गरी बस्दै आएका थिए । श्रीमती विदेश गएपछि बलिभद्र छोराछारीको रेखदेख गर्दै आएका थिए । ‘दिदीको मृत्युले उहाँको परिवारमा बज्रपात परेको छ । भान्जाभान्जीको लालन–पालन र शिक्षा–दिक्षामा समस्या आइपरेको छ,’ उनले भने,‘परिवारको कमाइ गर्ने मूल सहारा नै गुमेको छ।’
उनको मृत्युको खबरले बुवा ७२ वर्षीय पुण्यबहादुर र आमा ६८ वर्षीया मुगाकुमारी अधिकारी बेलाबेला बेहोस भइरहेका छन् । दुई छोरी र एक छोरा मध्येकी उनी जेठी छोरी थिइन् । परिवारजनका अनुसार उनी दलालको भरमा भिजिट भिषामा कुवेत पुगेकी थिइन् । दिदी भिजिट भिषामा कुवेत गएको भाई मानवले बताए ।
