काठमाडौँ — फिल्म निर्माणमा सरकारी रकम अनियमितता गरेको आरोपमा अछामको ढकारी गाउँपालिकाका अध्यक्ष प्रकाशबहादुर साउदसहित ४ जनाविरुद्ध भ्रष्टाचार मुद्दा दायर भएको छ ।

अख्तियार दुरुपयोग अनुसन्धान आयोगले बिहीबार अध्यक्ष साउदसहित तत्कालीन निमित्त प्रमुख प्रशासकीय अधिकृत लक्ष्मण साह र लेखापाल विमल साउद तथा आरजे २४ न्युज एवं नव इन्द्रेणी फाउन्डेसन काठमाडौंका अध्यक्ष रामजी लम्साल भन्ने रामबहादुर लम्सालविरूद्ध विशेष अदालतमा मुद्दा दायर गरेको हो ।

अख्तियारले पालिकाका अध्यक्ष, प्रमुख प्रशासकीय अधिकृत र लेखापालविरुद्ध १२ लाख ७७ हजार २ सय २५ रुपैयाँ बिगो कायम गरी बिगोबमोजिम जरिवाना र हिनामिना भएको रकम असुलउपरको मागदाबी लिएको छ । कम्पनीका सञ्चालक लम्सालविरुद्ध पनि मतियारका रुपमा त्यत्ति नै बिगो कायम गरी सजाय मागदाबी गरिएको अख्तियारले जनाएको छ ।

ढकारीका अध्यक्ष, उपाध्यक्ष, वडाध्यक्ष तथा कार्यसमिति सदस्यले 'अन्धपथ' फिल्ममा १५ लाख रूपैयाँ छुट्याएर सरकारी बजेट दुरुपयोग गरेको व्यहोराको उजुरी अख्तियारमा परेको थियो । लम्साल फिल्मका निर्माता हुन् ।

अध्यक्ष साउद, निमित प्रमुख प्रशासकीय अधिकृत साह र लेखापाल विमल साउद तथा लम्सालले मिलेमतो र बदनियतपूर्वक काम गरेको अख्तियारको ठहर छ । सार्वजनिक खरिदसम्बन्धी कानुनविपरीत पालिकाको बजेट दुरुपयोग गरी अन्धपथ चलचित्र निर्माण गर्न १८ भदौ २०८१ मा सम्झौता गरेको भेटिएको थियो ।

‘प्रचलित कानुनबमोजिम खरिद आवश्यकताको पहिचान, लागत अनुमान निर्माण लगायतको खरिद कारबाहीको तयारी नगरी नगराई चलचित्र निर्माणका लागि सम्झौता गरे गराएको तथा उक्त कानुनविपरीतको बदनियतपूर्ण कार्यलाई ढाकछोप गर्न २०८१ कात्तिक ६ गते राष्ट्रसेवक प्रतिवादीहरू नै मुख्य भई कार्य गर्ने कार्यपालिकाको बैठकले सम्झौतालाई अनुमोदन गरे/गराएको र १५ लाख ५ हजार रुपैयाँको सम्झौता बिनाप्रतिस्पर्धा सोझै खरिद कार्य गरे गराएको,’ अख्तियारको अभियोगपत्रमा उल्लेख छ । एउटा कम्पनीसँग सम्झौता गरेर रकमको भुक्तानी नव इन्द्रेणी फाउन्डेसनलाई गरेको विषयलाई पनि अख्तियारले भ्रष्टाचारजन्य कसुरका रुपमा राखेको छ ।