काठमाडौँ — गैरआवासीय नेपाली संघ (एनआरएनए)का नवनिर्वाचित अध्यक्ष हेमराज शर्माले एनआरएनएलाई ‘रिब्राण्डिङ’ गर्दै विदेशमा रहेका गैरआवासीय नेपालीको सवाललाई स्थापित गर्ने बताएका छन् ।

‘१३ वर्षपछि संघले सर्वसम्मत नेतृत्व चयन गरेसँगै नयाँ अध्याय सुरु भएको छ । अब संघलाई समावेशी, पारदर्शी, परिणाममुखी, प्रविधियुक्त र पुस्तौंसम्म टिक्ने संस्था बनाउँछौं,’ एनआरएनएको १२‌‍औं विश्व सम्मेलन तथा वृहत अन्तराष्ट्रिय महाधिवेशन समापन समारोहमा सम्बोधन गर्दै उनले भने, ‘एनआरएनएलाई नेपाली डायस्पोराको साझा शक्ति र पहिचान दिने संस्था बनाउँदै मातृभूमिसँगको सम्बन्ध दिगो र प्रभावकारी बनाउन फरक र स्पष्ट दृष्टिकोणसहित रिब्राण्डिङ आवश्यक छ । त्यसको सुरुवात भएको छ ।’

यसअघि एनआरएनएको नेतृत्व चयनसम्बन्धमा विवाद भएपछि  तीन समूहमा विभाजित भएको थियो । आधिकारिकताको बिषयलाई लिएर उच्च हुँदै सर्वोच्च अदालतसम्म विवाद पुगेको थियो । यी सबैलाई हल गर्दै एकता महाधिवेशनले शर्माको नेतृत्वमा नयाँ कार्यसमिति चयन गरेको हो ।