काठमाडौँ — खाडी मुलुकस्थित अमेरिकी सैन्य क्याम्प र जोखिमयुक्त क्षेत्रमा रहेका नेपाली श्रमिकलाई रोजगारदाताले सुरक्षित स्थानमा सारेका छन् । इरानले निसाना बनाउन सक्ने स्थानमा रहेका श्रमिकलाई सुरक्षित ठाउँमा सारिएको हो । 

अमेरिका र इजरायलले इरानमाथि हमला गरेपछि इरानले पश्चिम एसियामा रहेका अमेरिकी सैन्य क्याम्पलाई निसाना बनाइरहेको छ । सबैभन्दा पहिला बहराइनस्थित अमेरिकी सैन्य क्याम्पमा आक्रमण गरिएको थियो । ‘हामीलाई आक्रमण गर्नु दुई दिनअघि नै अरू स्थानमा लगेर राखिएको थियो । अहिले हामी सुरक्षित छौं,’ बहराइनको अमेरिकी सैन्य क्याम्पमा कार्यरत एक नेपालीले भने, ‘हामी परिवारसँग नियमित सम्पर्कमा छौं ।’ बहराइनले अमेरिकी क्याम्प आसपासबाट सबैलाई स्थानान्तरण गरिसकेको छ । बहराइनमा भएको आक्रमणमा एक एसियाली श्रमिकको मृत्यु भएको थियो । कतार, कुवेत, साउदी अरब, ओमान, जोर्डन र इराकस्थित अमेरिकी सैन्य क्याम्पमा कार्यरत नेपाली श्रमिक पनि स्थानान्तरण भएका छन् । 

इराकको कुर्दिस्तानस्थित अर्बिल विमानस्थलमा रहेका एक सय ५० नेपालीलाई सुरक्षित स्थानमा सारिएको छ । खाडी क्षेत्र हेर्ने परराष्ट्र मन्त्रालयको पश्चिम एसिया महाशाखाका प्रमुख रामकाजी खड्काका अनुसार उनीहरूलाई होटलमा राखिएको छ । इरानले अर्बिल विमानस्थलस्थित अमेरिकी बेस क्याम्पमा पनि आक्रमण गरेको थियो । 

कतारको अमेरिकी सैन्य क्याम्पबाट पनि नेपालीलाई हटाइएको छ । खाडी क्षेत्रको सबैभन्दा ठूलो उक्त क्याम्पमा झन्डै पाँच सय नेपाली काम गर्थे । ‘विभिन्न कम्पनीले त्यहाँको क्याम्पमा काम गर्न श्रमिक पठाउँछन् । ती श्रमिकले मर्मतसम्भार र सरसफाइको काम गर्छन्,’ एक नेपालीले भने, ‘हाम्रो कम्पनीबाट जति जना लगिएको थियो, सबै अहिले कम्पनीकै क्याम्पमा छौं । अहिले क्याम्पभित्र गैरसैनिक जान बन्द गरिएको छ ।’

संवेदनशील क्षेत्र मानिएको कतारको हमाद विमानस्थल बन्द गरिएको छ । त्यहाँ कार्यरत १५ सय नेपालीलाई सुरक्षित ठाउँमा सारिएको छ । हमाद अन्तर्राष्ट्रिय विमानस्थललाई ‘ट्रान्जिट’ बनाएका ८ हजार यात्रुलाई पनि सुरक्षित ठाउँमा लगिएको कतारले जनाएको छ । 

कतारको विदेश मन्त्रालयका प्रवक्ता मजिद मोहम्मद अल अन्सारीले हमाद विमानस्थलाई लक्ष्य गरी भएको आक्रमणलाई विफल बनाइएको बताए । कतारको रक्षा मन्त्रालयले कतारको आकाशमा पहिचान भएका क्रुज मिसाइल, ब्यालिस्टिक मिसाइल, ड्रोन र फाइटरलाई निस्तेज बनाएको जनाएको छ । तीन वटा ब्यालिस्टिक मिसाइल र १५ वटा ड्रोन भने कतारमा झरेका थिए । कतारका बाहिरी क्षेत्रका अधिकांश परियोजनामा काम रोकिएको छ । भवनभित्र भने काम भइरहेको छ । ‘हामी भित्र काम गरिरहेका छौं । बाहिर भने रोकिएको छ,’ कतारमा कार्यरत भीम तरामु मगरले भने ।

यूएई स्थितिलाई सामान्यीकरण बनाउने प्रयासमा छ । मंगलबार आयोजित यूएई सरकारको ‘मिडिया ब्रिफिङ’ मा राष्ट्रिय संकट तथा आपत्कालीन व्यवस्थापन प्राधिकरणले विद्युत्, पानी, दूरसञ्चार, यातायात, स्वास्थ्य सेवा तथा वस्तु आपूर्तिलगायतका अत्यावश्यक सेवा अवरोधबिना सञ्चालन भइरहेको जनाएको छ । यूएईमा कार्यरत जुना ओझाका अनुसार प्रमुख मलहरू सुनसान छन् । यूएईको रक्षा मन्त्रालयका अनुसार वायु प्रतिरक्षा प्रणालीले मंगलबार इरानबाट आएका ११ वटा ब्यालिस्टिक मिसाइल र १ सय २३ वटा ड्रोन निस्तेज पारेको थियो । एउटा मिसाइल यूएईको जमिनमा खसेको भए पनि कुनै मानवीय क्षति नभएको रक्षा मन्त्रालयले जनाएको छ ।

इरानले शनिबारयता यूएईमा १ सय ८६ वटा ब्यालिस्टिक मिसाइल प्रहार गरिसकेको छ । तीमध्ये १ सय ७२ वटा नष्ट गरिएको, १३ वटा समुद्रमा र एउटा जमिनमा खसेको त्यहाँको रक्षा मन्त्रालयले जनाएको छ । आबुधाबी विमानस्थलमा ड्रोन खस्दा नेपाली श्रमिक दिवस श्रेष्ठको मृत्यु भएको थियो ।

खाडी मुलुकका सबै क्षेत्रमा नेपाली श्रमिक सामान्य र सुरक्षित रहेको परराष्ट्र मन्त्रालयले जनाएको छ । ‘खाडी क्षेत्र हेर्ने १० वटा नियोगबाट हामीले नेपाली सुरक्षित रहेको विवरण प्राप्त गरेका छौं,’ परराष्ट्र प्रवक्ता लोकबहादुर पौडेल क्षेत्रीले भने, ‘नेपाली दूतावासबाट सरकारी निकाय, नेपाली समुदायसँग नजिकको सम्पर्क र समन्वय भइरहेको छ ।’ परराष्ट्र सचिवको नेतृत्वमा ‘इमर्जेन्सी रेस्पोन्स टिम’ गठन भइसकेको पनि पौडेलले जानकारी दिए । ‘यसबाट नेपालीको सुरक्षा र उद्धारका लागि प्रभावकारी रूपमा काम गर्न सकिने विश्वास छ,’ उनले भने ।