काठमाडौं — प्रतनिधिसिभा सदस्य चयनका लागि बिहीबार हुने निर्वाचनमा केही चर्चित उम्मेदवारले आफैंलाई मतदान गर्न पाउने छैनन् । 

प्रतिनिधिसभा निर्वाचनमा मुलुकको जुनसुकै क्षेत्रबाट उम्मेदवार हुन पाउने कानुनी प्रावधान छ । साेही कारण कयौं नेताहरू आफ्नो मतदाता नामावली नभएका क्षेत्रबाट उम्मेदवार बनेका छन् ।

एमाले अध्यक्ष केपी शर्मा ओली झापा-५ बाट उम्मेदवार भएका छन् । उनको मतदाता नामावली भक्तपुर नगरपालिका छ । भक्तपुर-२ बालकोटस्थति महेन्द्र शान्त विद्यालयको केन्द्रबाट उनले मतदान गर्दै आएका छन् । यसपटक पनि उनले भक्तपुर-२ का उम्मेदवारलाई र समानुपातिकमा पार्टीलाई मतदान गर्ने छन् । भक्तपुरमा मतदान गरेपछि ओली झापा जाने कार्यक्रम छ ।

नेपाली कम्युनिस्ट पार्टी (नेकपा) का संयोजक पुष्पकमल दाहाल पनि रुकुम पूर्वबाट उम्मेदवार भएका छन् । उनले पनि आफूलाई मतदान गर्न पाउने छैनन् । उनले चितवन भरतपुर महानगरपालिका–१४ स्थित नेपाल प्रहरी स्कूल शान्तिपुर मतदान केन्द्रबाट मतदान गर्ने छन् । चितवन-३ मा उनले नेकपाका उम्मेदवारलाई मतदान गरी त्यही दिन रुकुम पूर्व जाने कार्यक्रम छ ।