काठमाडौँ — नेपाल पत्रकार महासंघले आगामी फागुन २१ गते हुने आमनिर्वाचनको रिपोर्टिङ गर्दा संयम र जिम्मेवार बन्न पत्रकार तथा सञ्चारगृहलाई आग्रह गरेको छ। महासंघकी अध्यक्ष निर्मला शर्माले आइतबार एक अपिल जारी गर्दै मुलुकको वर्तमान संवैधानिक जटिलताका बीच प्रेस स्वतन्त्रताको प्रयोग र व्यावसायिक मर्यादामा अडिग रहन आह्वान गरेकी हुन् ।

महासंघले निर्वाचनका बेला सामाजिक सञ्जालमा फैलिने भ्रमपूर्ण सूचना (फेक न्युज) लाई चिर्न सञ्चारमाध्यमको भूमिका निर्णायक हुने जनाएको छ । 'समाजमा व्याप्त भ्रमलाई चिर्न सत्य-तथ्य र निष्पक्ष सामग्री प्रकाशन-प्रसारण गर्नु नै पत्रकार र सञ्चारगृहको व्यावसायिक धर्म हो,' अध्यक्ष शर्मा द्वारा हस्ताक्षरित अपिलमा उल्लेख छ।

महासंघले निर्वाचनमा खटिने पत्रकारहरूको भौतिक सुरक्षा र पेशागत अधिकार सुनिश्चित गर्न सरोकारवाला पक्षलाई सचेत गराएको छ । दुर्गम क्षेत्रमा रिपोर्टिङका लागि खटिने पत्रकारहरूको सुरक्षा र आकस्मिक उद्धारका लागि 'मिडिया सेफ्‌टी डेस्क' स्थापना गर्न तथा आवश्यक परेको खण्डमा हवाई उद्धारको व्यवस्था मिलाउन पनि राज्यसँग आग्रह गरेको छ । 

साथै, निर्वाचनको समयमा पत्रकारहरूलाई समाचार संकलन, लेखन र प्रसारणमा कुनै पनि अवरोध नगर्न आग्रह गर्दै प्रेस पासका आधारमा सवारी साधनलाई निर्वाध आवतजावतको वातावरण मिलाउन सम्बन्धित निकायको ध्यानाकर्षण गराएको छ ।

महासंघले विगतका आन्दोलनका बेला सञ्चारगृह र पत्रकारहरूले व्यहोरेको भौतिक क्षति तथा 'सेल्फ-सेन्सरसीप'को अवस्थालाई स्मरण गर्दै अहिले पनि अघोषित सेन्सरसीप कायम रहेकोमा चिन्ता व्यक्त गरेको छ । संविधानले सुनिश्चित गरेको पूर्ण प्रेस तथा अभिव्यक्ति स्वतन्त्रताको उपयोग गर्दै निर्वाचन आचारसंहिताको पूर्ण परिपालना गर्न महासंघले आफ्ना सदस्यहरूलाई निर्देशन दिएको छ ।

'संविधान रहेमात्र प्रेस स्वतन्त्रता रहन्छ,' अपिलमा भनिएको छ, 'मुलुकको यो संवेदनशील अवस्थामा पेशागत इमान्दारिताका साथ उच्च व्यावसायिकताको पुनर्पुष्टि गर्नु आजको आवश्यकता हो ।'