काठमाडौँ — मध्यपूर्व क्षेत्रमा विकसित हुँदै गएको सुरक्षा तथा राजनीतिक परिस्थितिका कारण शनिबार विभिन्न देशहरूले हवाई क्षेत्र अस्थायी रूपमा बन्द गरेपछि मध्यपूर्वी आकाश हुँदै युरोप, क्यानडा र संयुक्त राज्य अमेरिकालगायतका गन्तव्यका लागि हुने अन्तर्राष्ट्रिय उडानहरू व्यापक रूपमा कटौती भएका छन् । यस निर्णयले हजारौं यात्रुहरू प्रत्यक्ष रूपमा प्रभावित भएका छन् भने विश्वव्यापी उड्डयन सञ्जालमा समेत असर परेको अन्तराष्ट्रिय संचारमाध्यमले जनाएका छन् । 

कुवेतको सार्वजनिक नागरिक उड्डयन प्राधिकरणले क्षेत्रीय सुरक्षा विकासलाई ध्यानमा राख्दै कुवेत अन्तर्राष्ट्रिय विमानस्थलको हवाई क्षेत्र अस्थायी रूपमा बन्द गर्ने घोषणा गरेको छ । प्राधिकरणका प्रवक्ता अब्दुल्लाह अल–राज्हीले यात्रु, विमान कम्पनी र विमानस्थल सञ्चालनको सुरक्षा सुनिश्चित गर्न पूर्वसावधानी कदमस्वरूप यस्तो निर्णय गरिएको बताएका छन् । सम्बन्धित निकायहरू स्थानीय तथा अन्तर्राष्ट्रिय साझेदारहरूसँग समन्वय गरी अवस्था अनुगमन गरिरहेको उनले जनाएको एजेन्सीहरुले समाचारमा उल्लेख गरेका छन् ।

जजिरा एयरवेजले कुवेत अन्तर्राष्ट्रिय विमानस्थल बन्द भएपछि आफ्ना सबै उडानहरू अर्को सूचना नभएसम्मका लागि स्थगित वा ढिलाइ हुने जनाएको छ । कुवेत जाने वा त्यहाँबाट प्रस्थान गर्ने यात्रुहरूलाई कम्पनीबाट सूचना नआएसम्म विमानस्थल नजान आग्रह गरिएको छ ।

भारतको इन्डिगो एयरले इरान र मध्यपूर्व वरपरको हवाई क्षेत्रमा लागू प्रतिबन्धका कारण मध्यपूर्व जाने र आउने सबै उडानहरू शनिबार मध्यरातिसम्मका लागि रद्द गरिएको जनाएको छ । प्रभावित यात्रुहरूलाई वैकल्पिक यात्रा व्यवस्था वा पूर्ण रकम फिर्ताको विकल्प उपलब्ध गराइएको कम्पनीले जनाएको छ ।

संयुक्त अरब इमिरेट्सस्थित फ्लाईदुबईले फेब्रुअरी २८ का लागि केही उडानहरू रद्द गर्दै अस्थायी रूपमा सञ्चालन स्थगित गरेको जनाएको छ भने दुबईस्थित एमिरेट्स एयरलाइन्सले क्षेत्रीय हवाई क्षेत्र बन्दका कारण दुबई आउने–जाने उडानहरू अस्थायी रूपमा रोकेको पुष्टि गरेको छ । दुवै कम्पनीले सम्बन्धित निकायहरूसँग समन्वय गरी अवस्था नजिकबाट अनुगमन गरिरहेको बताएका छन् ।

साउदी अरेबियाको राष्ट्रिय ध्वजावाहक साउदीयाले पनि उड्डयन सुरक्षा मापदण्डअनुसार केही उडानहरू स्थगित वा रद्द गरेको जनाएको छ । कम्पनीको आपतकालीन समन्वय केन्द्रले अवस्थाको निरन्तर निगरानी गरिरहेको जनाएको छ ।

त्यस्तै, कतार एयरवेजले कतारी हवाई क्षेत्र बन्द भएपछि दोहा आउने–जाने उडानहरू अस्थायी रूपमा स्थगित गरेको जनाएको छ ।

भारतकै आकासा एयरले अबुधाबी, दोहा र जेद्दा जाने तथा आउने सबै उडानहरू फेब्रुअरी २८ का लागि स्थगित गरेको जनाएको छ ।