काठमाडौंको वसन्तपुरमा शुभ साइतमा चीर ठड्याएर फागुपर्वको विधिवत् सुरुवात गरिएको छ ।
काठमाडौँ — काठमाडौंको वसन्तपुरमा मंगलबार बिहान शुभ साइतमा चीर ठड्याएर यो वर्षको फागुपर्वको विधिवत् रूपमा सुरुवात गरिएको छ ।बिहान ७ बजेर १३ मिनेटको शुभ साइतमा चीर ठड्याइएको हो । चीर ठड्याएपछि देशभर फागु (होली) पर्व सुरु भएको मानिन्छ ।
वसन्त ऋतुको आगमनसँगै मनाइने भएकाले यस पर्वलाई वसन्तोत्सव वा मदनोत्सवका रूपमा लिइन्छ । आपसमा मैत्री एवं सद्भावपूर्वक खेलिने यो पर्वमा ख्याली, टप्पा र वसन्त राग गाउँदै, नाच्दै अबिर लगाएर शुभकामना आदानप्रदान गरिन्छ ।
