भैरहवा — राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले मतदान गर्नु नागरिक अधिकार भएकाले मत खेर नफाल्न अनुरोध गरेका छन् । प्रत्येक नागरिकले मतदानमार्फत मुलुकको भविष्य निर्धारण गर्ने भएकाले चुनावमा सहभागी हुन  उनले आग्रह गरेका हुन् । 

रूपन्देही–१ का राप्रपा उम्मेदवार प्रज्वल बोहराको प्रचारप्रसारका लागि शनिबार देवदहमा आयोजित चुनावी सभामा बोल्दै लामो समयदेखि भविष्यमा विद्रोह गर्न नपर्ने गरी दल र राजाबीच राष्ट्रिय समझदारी गर्न आग्रह गरे पनि बेवास्ता गरिएकाले जनताले नै राप्रपालाई मत दिएर दबाब सिर्जना गर्नुपर्ने उनले बताए । 

उनले मुलुकमा राष्ट्रिय समझदारी कायम गर्नका लागि दबाब पुग्ने किसिमले मतदान गर्न आग्रह गरेका छन् । उम्मेदवारले घरदैलोमा आएर नमस्कार गर्ने दिन फागुन २१ सम्म भएकाले सोचेर मात्र आफ्नो मत सदुपयोग गर्न पनि उनले आग्रह गरे । 

नयाँ समझ्दारी नगरेको खण्डमा मुलुक दुर्घटनामा पर्ने र नेताहरू भाग्नु पर्ने चेतावनी दिए पनि नसुनेको उनले बताए । २०८४ सालमा गर्नुपर्ने आवधिक निर्वाचन ०८२ मा गर्दैमा समस्या हल नहुने उल्लेख गर्दै जतिसक्दो छिटो राजा र दलबीच नमिलेका कुरा मिलाउनु पर्नेमा उनले जोड दिए । एउटा प्रजातान्त्रिक दलका रूपमा राप्रपा निर्वाचनमा सहभागी भएको उनले बताए । 

‘मुलुक निर्वाचनमय भइसकेको छ,’ उनले भने, ‘त्यसैले राजा र दलबीच सहकार्यका लागि शक्ति आर्जन गर्ने गरी हामीलाई भोट दिनूस् ।’ मतदान नगर्दा नागरिकको अधिकार खेर जाने भएकाले विवेक पुर्‍याएर मतदान गर्न उनले आग्रह गरे ।

मुलुकमा २०४६ सालपछि दलले अभ्यास गरेको प्रजातान्त्रिक, लोकतान्त्रिक र गणतान्त्रिक शासन भोगिसकेको जनाउँदै अब पनि पुरानै दललाई मतदान गर्नुअघि हजार पटक विचार गरेर मतदान गर्न उनले आग्रह गरे । ‘३० वर्षसम्म मुख्य नेताका हातमा मुलुक थियो,’ उनले भने, ‘शासनको जे नाम दिए पनि देश सुधार हुन सकेन ।’