पर्सा — चितवन–पर्सा कम्प्लेक्समा बाघ गणना सम्पन्न भएको छ । यो कम्प्लेक्सको तेस्रो ब्लकमा तीन साताअघि बाघ गणनाका लागि जडान गरिएका क्यामरा बिहीबार हटाइएको चितवन राष्ट्रिय निकुञ्जका संरक्षण अधिकृत हेमराज आचार्यले जानकारी दिए ।

आचार्यले चितवन–पर्सा कम्प्लेक्सलाई तीन ब्लकमा विभाजित गरी बाघ गणना सम्पन्न गरिएको बताए । पुस १ देखि यो कम्प्लेक्समा बाघ गणना सुरु गरिएको थियो । अन्तिम चरणमा पर्सा राष्ट्रिय निकुञ्ज कार्यालयबाट पश्चिम तथा पूर्व, पर्सा, बारा र मकवानपुर डिविजन वन कार्यालयका मातहतको केही क्षेत्रमा एकै साथ क्यामेरा जडान गरिएको थियो ।  

बाघ गणनाका लागि ‘क्यामरा ट्रयाप विधि’ प्रयोग गरिएको थियो । यस पटक गणनाका लागि निकुञ्ज र बाघ पाइएको निकुञ्जबाहिरको ठूलो वन क्षेत्र समेटिएको थियो ।  

बाघ गणनाका लागि क्यामरा जडान गर्न १२ वटा शिविर खडा गरिएको थियो । शीतलपुर, भाठा, महादेवपट्टी, अमलेखगन्ज, चुरियामाई, रातोमाटे, सहजनाथ, निजगढ, चपुर, तामागढी र घोडेमसानमा गरी ती १२ शिविर स्थापित गरिएका थिए । भाठामा मात्र दुई वटा र अन्य सबै स्थानमा १/१ शिविर थिए । सबै शिविरमा ७ जनाको दरले प्राविधिक टोली गरेर सात दर्जन जनशक्ति खटिएका थिए । 

बाघ गणनाका लागि प्रत्येक दुई वर्ग किलोमिटको फरकमा एक जोडी क्यामेरा जडान गरिएको थियो । यसरी करिब ६ सय क्यामरा बाघ गणनामा प्रयोग गरिएको थियो । जमिनबाट ४० देखि ६० सेन्टीमिटरको उचाइमा र ६ देखि ८ मिटरको फरकमा ती क्यामरा जडान गरिएका थिए । ती क्यामराले एकैसाथ सम्पूर्ण ब्लकमा नभ्याउने भएकाले दुई पटकमा गरी ब्लकका सम्पूर्ण क्षेत्रमा क्यामरा  बाघ गणनाका लागि बिछ्याइएको थियो ।