बर्दिया — भारतीय वन विभागले सीमावर्ती बहराइचस्थित कतरनियाघाट वन्यजन्तु संरक्षण क्षेत्रमा घाँस काट्न, दाउरा बटुल्न र चरिचरन गर्न निषेध गरेको छ । घाँस काट्न जाँदा वन्यजन्तुको आक्रमणबाट सर्वसाधारणको ज्यानै जान थालेपछि संरक्षण क्षेत्रअन्तर्गत धर्मापुर रेन्जपोष्टले नेपालीमाथि प्रतिबन्ध लगाएको जनाएको छ ।

सीमावर्ती नेपाली गाउँका अधिकांश किसान घाँस दाउराका लागि भारतीय वनमै आश्रित छन् । नेपाली सीमावर्ती क्षेत्रमा वन छैन । वन विभाग, धर्मापुरका वनकर्मी संजय मिश्राले जंगलमा प्रवेश गरी घाँस-दाउरा गर्न गएकाहरूलाई वन्यजन्तुले आक्रमणगरी ज्यानै लिन थालेपछि घाँस काट्न रोक लगाएको बताए ।

कतरनियाघाट वन्यजन्तु आरक्षमा बाघ, चितुवा र हात्तीको संख्या बढीरहेको मिश्राले बताए । सीमावर्ती क्षेत्रका बस्तीमा वनबाट आएका चितुवाले दिनहुँ कुकुरसहित घरपालुवा जनावारमाथि आक्रमण गर्ने र मारेर खान थालेको छ । साँझ पर्नासाथ भारतीय वनबाट चितुवा निस्केर बस्तीमा पस्ने गरेको मधुवन नगरपालिकाकी सूचना सुनारले बताइन् । भारतीय वनमा यसअघि पुरुषलाई प्रवेशमा रोक लगाएको थियो,’ उनले भनिन् ‘महिलालाई घाँस, दाउरा ल्याउन दिए पनि अहिले बाघ, चितुवा र हात्तीको त्रासले रोक लगाएको छ ।’