निर्वाचन आयोगका अनुसार शुक्रबार बिहानसम्म प्रत्यक्षतर्फको १ करोड ७१ लाख ६३ हजार मतपत्र छपाइ भएको छ ।
काठमाडौँ — २१ फागुनमा हुने प्रतिनिधिसभा निर्वाचनका लागि पहिलो हुने निर्वाचित हुने निर्वाचन प्रणाली (प्रत्यक्ष)तर्फ १ सय ३३ निर्वाचन क्षेत्रको मतपत्र छपाइ पूरा भएको छ ।
निर्वाचन आयोगका अनुसार शुक्रबार बिहानसम्म प्रत्यक्षतर्फको १ करोड ७१ लाख ६३ हजार मतपत्र छपाइ भएको छ । ती मतपत्रहरू सम्बन्धित निर्वाचन क्षेत्रहरूमा पठाउनका लागि १ हजार ५ सय ३१ बाकसमा प्याकिङ गरिसकिएको छ ।
आयोगका सहायक प्रवक्ता प्रकाश न्यौपानेका अनुसार प्रत्यक्षतर्फ १ सय ६५ वटै निर्वाचन क्षेत्रका लागि २ करोड ३ लाख २३ हजार प्रति मतपत्र छापिने छन् । प्रत्यक्षतर्फको मतपत्र १६ माघदेखि छाप्न सुरु भएको हो ।
समानुपातिकतर्फ २ करोड ८ लाख ३० हजार मतपत्रको छपाइ त्यस अगावै सम्पन्न भएर जिल्ला–जिल्ला पठाउनका लागि प्याकिङ गरेर राखिएको छ ।
कर्णाली प्रदेशका सल्यान, रुकुम पश्चिम, डोल्पा, मुगु, हुम्ला, कालिकोट, जुम्ला, जाजरकोट, दैलेख र सुर्खेत गरी १० जिल्लाका १२ निर्वाचन क्षेत्रको मतपत्र बिहीबार पुर्याइसकिएको छ ।
