मुम्बई — नेपालले पछिल्लो ट्वान्टी–२० विश्वकपमा दक्षिण अफ्रिकालाई झन्डै झन्डै हराइसकेको थियो । सायद यो कुरा अफ्रिकी कप्तान एडेन मारक्रमलाई भन्दा बढी कसलाई सम्भना होला र ? त्यसैले उनले ठीकै भनेका हुन्, ‘यसपल्टको विश्वकपमा कोहीले कसैलाई पनि हराउन सक्छ ।’

भारत र श्रीलंकामा ट्वान्टी–२० विश्वकप सुरु हुन एक दिन बाँकी छँदा भारतीय क्रिकेट नियन्त्रण बोर्ड (बीसीसीआई) को मुख्यालयमा ‘क्याप्टेन्स डे’ मनाइयो । त्यसमा भारतमा खेल परेका ११ कप्तान उपस्थित थिए । 

दुई चरणमा भएको कार्यक्रम मुख्यतः तीन विषयमा केन्द्रित रह्यो, एसोसियट देशको बढ्दो सम्भावना, झन् झन् ब्याटरमैत्री भएको ट्वान्टी–२० क्रिकेट अनि पाकिस्तानले भारतविरुद्धको खेल बहिष्कारको मुद्दामा केन्द्रित रह्यो । यसपल्टको विश्वकपमा एसोसियट देशको सम्भावनाबारे सोधिएका प्रश्नमा नामिबिया, स्कटल्यान्ड, अमेरिका, इटाली, अमेरिका र क्यानडासँगै नेपालका कप्तानको दाबी थियो, आफ्नो देशको प्रतिनिधित्व गरेर विश्वकप खेल्नु आफैमा ठूलो हो, यो अवसरको भरपुर सदुपयोग गर्नेछौं । 

नेपालका कप्तान रोहितकुमार पौडेलले टिमको लक्ष्य भनेकै प्रतियोगिताको सुपर–एट पुग्ने रहेको बताए । उनले यो विश्वकपमा नेपालको सहभागिताले अबको पुस्तालाई यस खेलसँग जोडिन प्रेरित गर्ने बताएका छन् । कान्तिपुरको प्रश्नमा रोहितले भने, ‘अहिलेको टिममा जति पनि खेलाडी छन्, ती सबै सन् २०१४ मा नेपालले खेलेको पहिलो ट्वान्टी–२० विश्वकपबाट प्रेरित भएर क्रिकेटमा आएका छन् । मलाई के विश्वास छ भने यो विश्वकपमा हाम्रो सहभागिताले अबको पुस्तालाई क्रिकेटमा आफ्नो करियर देख्न सहयोग गर्नेछ ।’ 

यसैक्रममा उनको के माने भने यसका लागि प्रतियोगितामा नेपाली टिमको प्रदर्शन पनि राम्रो हुनुपर्नेछ । उनले प्रतियोगितामा नेपालको सम्भावनाबारे सकारात्मक रहनुपर्ने बताए । उनको तर्क थियो, ‘हामीले वेस्ट इन्डिजलाई हराएका मात्र छैनौं, सिरिज नै जितेका छौं । बंगलादेश र दक्षिण अफ्रिकाविरुद्धको खेलमा पनि हामी जितको नजिकसम्म पुग्न सकेका थियौं । यो सबै कुराले हामीलाई यसपल्टको विश्वकपमा खेल्न प्रेरित गरिराख्नेछ ।’ 

बलरलाई गाह्रो

यो विश्वकपमा पनि सबैभन्दा गाह्रो कसैलाई हुनेछ, त्यो बलरलाई हुनेछ । किनभने अबदेखि ट्वान्टी–२० क्रिकेटमा नियमित रूपमा तीन सयको स्कोर बन्न सक्नेछ । इंग्लिस कप्तान ह्यारी ब्रुक्सले ट्वान्टी–२० क्रिकेट बढीभन्दा बढी ब्याटरतर्फ ढल्केको स्वीकारे । भारतीय कप्तान सूर्यकुमार यादवले पनि यो तथ्य नकार्न सकेनन् । उनको भनाइ थियो, ‘हाम्रा आफ्नै बलरलाई कति धेरै गाह्रो हुन्छ, त्यो मलाई राम्रोसँग थाहा छ । मलाई बलरप्रति सहानुभूति छ ।’

ब्याटर झन् झन् आक्रामक हुन थालेको, रनको वर्षा हुन थालेको मात्र होइन, बलर स्वयं निराश हुन थालेकोबारे सबैभन्दा सटिक उत्तर अफगानिस्तानका कप्तान राशिद खानको थियो । उनले भने, ‘यदि बलरले २ सय ५० देखि ३ सय रन बन्ने छ भनेर सोच्छ भने त्यो ठीक भएन । यो मानसिकता सबैभन्दा पहिला हटाउनुपर्छ । कम्तीमा म आफैं एउटा बलर भएको नाताले यस्तो सोच्दिनँ । यही बलरले राम्रो बलिङ गर्छ भनेर कसैले केही भन्न सक्दैन ।’

राशिदले थपे, ‘यही कसैले योर्कर बलिङ गर्छ भने त्यसमा छक्का प्रहार गर्न सकिन्न । यही कसैले ठीक स्थानमा सटिक बलिङ गर्छ भने त्यसमा कसैले सजिलै चौका प्रहार गर्न सक्दैन । ट्वान्टी–२० क्रिकेटमा ठुल्ठूला स्कोर मात्र बनेका छैनन्, कमजोर स्कोर पनि तयार भएका छन् । यो बलरकै कारण हो । बलरले जितको मानसिकताले खेल्नुपर्छ, त्यो भयो भने हुन्छ ।’

वेस्ट इन्डिजका कप्तान साइ होपको भनाइ भने यसमा केही फरक रह्यो । उनले भने, ‘एउटा ब्याटरको रूपमा हाम्रो लक्ष्य नै रहनेछ, तीन सयभन्दा बढीको रन बनाउने । क्रिकेट समय अनुसार फेरिएको छ । क्रिकेट खेल्ने ढंग फेरिएको छ । अहिले ट्वान्टी–२० क्रिकेटमा धेरै परिवर्तन आएको छ । कुनै टिमले यसै अनुसार तयारी गर्नुपर्छ । हामीले पनि त्यसरी नै तयारी गर्ने हो ।’