काठमाडौँ — राष्ट्रिय ट्रमा सेन्टरको ४५१ नम्बर वार्ड । सामान प्याक गरिरहेकी नन्दा बोहराको आँखामा खुसीका आँसु भरिएका थिए । बेडमा पल्टिरहेका छोरा प्रकाश सिरानीछेउ भएका पुस्तक साथीहरूलाई झोलामा हाल्न इंगित गरिरहेका थिए । नन्दाले छोरालाई हेर्दै भनिन्, ‘म अस्पताल आएकै दिन लागेको थियो, अब पाँच/छ महिना त यहीँ बित्छ भनेर ।’

जेन–जी आन्दोलनका क्रममा गोली लागेर गम्भीर घाइते भएका प्रकाश मंगलबार पाँच महिनापछि राष्ट्रिय ट्रमा सेन्टरबाट डिस्चार्ज हुँदाको क्षण थियो यो । 

गत २३ भदौमा नयाँ बानेश्वरस्थित संसद् भवनअघि भएको आन्दोलनका क्रममा उनको देब्रे खुट्टामा गोली लागेको थियो । नसामा गहिरो चोट पुगेपछि उनलाई लामो समय आईसीयूमा राखेर उपचार गर्नुपरेको थियो । ‘यी दिनहरू सजिला कहाँ थिए र । यति दुख्थ्यो, मलाई बाँच्दिनँ जस्तो हुन्थ्यो,’ प्रकाश भावुक सुनिन्छन् ।

त्यो दिन गोली लागेपछि प्रकाश ढलेका थिए । अस्पताल लैजाँदै गर्दा उनको एउटा जुत्ता छुटेको थियो । रगतले लतपतिएको त्यो जुत्ताको तस्बिर सामाजिक सञ्जालभरि छायो । २४ भदौको प्रदर्शनमा निस्किएका थुप्रै व्यक्ति त्यही लतपतिएको जुत्ता देखेर आक्रोशित देखिन्थे । जेन–जी आन्दोलनको प्रतीक बनेको त्यो आइकोनिक जुत्ता प्रकाशकै रहेको विषयमा कान्तिपुर दैनिकले समाचार प्रकाशित गरेको थियो ।

त्यो जुत्ताको पनि आफ्नै कथा थियो । त्यो कथा पनि प्रकाशले कान्तिपुरलाई सुस्केरासहित केही समयअघि सुनाएका थिए । २०७३ मा हेल्थ असिस्टेन्ट (एचए) पास गरेपछि प्रकाश लोक सेवा आयोगको परीक्षाको तयारीमा जुटेका थिए । भनेजस्तो नभएपछि उनले केही समय विभिन्न परियोजनामा काम गरे ।

केही समय दैलेख कारागारको स्वास्थ्य सेवा शाखामा पनि काम गरे । घरको सानो किराना पसल र सामान्य खेतीपातीबाट हुने आम्दानीका भरमा घर खर्च नचल्ने भएपछि प्रकाश आत्तिएका थिए । भूकम्पले भत्काएको घर बनाउँदा ऋण लागेको थियो । ऋण बढ्दै गएपछि उनले विभिन्न विकल्प खोजे, धेरैमा असफल भए । उनको छटपटी बढिरहेका बेला रुस–युक्रेन युद्ध सुरु भयो । साथीभाइको सल्लाहमा उनले रुसी सेनामा भर्ती हुन जाने निर्णय लिए । 

दुई वर्षअघि प्रकाश रुसी सेनामा भर्ती पनि भए, युक्रेनविरुद्धको लडाइँमा होमिए । संयोगले १० महिनाअघि सकुशल नेपाल फर्किन पाए । रुसी सेनाको कमाइबाट उनले बाइक किने । घर फर्किंदै गर्दा नेपालगन्जको एक पसलमा उनले सेलमा राखिएका दुई जोर जुत्ता पनि किने । त्यसमा एक जोर थियो– भाइरल बनेको सेतो जुत्ता । ‘साम्बा ब्रान्डको त्यो जुत्ता मैले १५ सय रुपैयाँमा किनेको थिएँ,’ प्रकाश सम्झन्छन् ।

जुत्ता भाइरल भइरहँदा प्रकाश भने आईसीयूमा थिए । त्यसपछिको अस्पताल बसाइ सहज भने थिएन । ‘मेरा लागि त्यो नर्क बराबर थियो,’ डिस्चार्जको तरखरमा रहेका प्रकाश भन्छन् । डेढ महिनादेखि भने उनको दुखाइ क्रमशः कम हुँदै गयो । ‘आज डाक्टरले डिस्चार्ज दिने भनेपछि खुसी पनि लाग्यो । यतिका समय बितेका दिनहरू सम्झिएँ,’ प्रकाश भन्छन् । अस्पताल बस्दा पनि प्रकाशको मन भने देशको भविष्यमाथि थियो । ‘परिवर्तनका लागि आवाज उठाएकै कारण गोली खाँदाको पीडा त छँदै थियो । अब देश कता जाने हो भन्ने कुराले बढ्ता पिरोलेको थियो,’ उनी सम्झिन्छन् ।