काठमाडौँ — सर्वसाधारण उपभोक्ताले बजारमा वस्तु तथा सेवा खरिद गर्दा भुक्तानी गर्नुपर्ने मूल्य अर्थात् बजार भाउ गत पुसमा औसत २.४२ प्रतिशत कायम भएको छ । गत वर्षको पुसमा यस्तो वृद्धिदर ५ दशमलव ४१ प्रतिशत रहेको थियो । यस आधारमा मूल्यवृद्धि गत वर्षको तुलनामा २ दशमलव ९९ प्रतिशत विन्दुले कम भएको देखिन्छ ।

राष्ट्र बैंकको प्रतिवेदनअनुसार आर्थिक वर्ष २०८२/८३ को पहिलो ६ महिनाको औसत मूल्यवृद्धिदर १ दशमलव ७० प्रतिशत रहेको छ । गत वर्षको सोही अवधिमा औसत मूल्यवृद्धिदर ४ दशमलव ९७ प्रतिशत थियो ।

चालु आर्थिक वर्षको ६ महिनामा खाद्य तथा पेय पदार्थ समूहको मूल्यवृद्धिदर ० दशमलव ०९ प्रतिशतले ऋणात्मक रहेको छ । सो अवधिमा गैर–खाद्य तथा सेवा समूहको मूल्यवृद्धिदर भने ३ दशमलव ८१ प्रतिशत कायम भएको छ । गत वर्षको पुसमा यी समूहहरूको मूल्यवृद्धिदर क्रमशः ७ दशमलव ६७ प्रतिशत र ४ दशमलव १९ प्रतिशत थियो ।

गएको ६ महिनामा खाद्य तथा पेय पदार्थ समूहअन्तर्गत फलफूल उप–समूहको वार्षिक विन्दुगत उपभोक्ता मूल्य सूचकांक ५ दशमलव २० प्रतिशतले बढेको छ । त्यस्तै घ्यू तथा तेलको ४ दशमलव ९६ प्रतिशत र गैर–मदिराजन्य पेय पदार्थको ३ दशमलव ०४ प्रतिशतले वृद्धि भएको राष्ट्र बैंकले जनाएको छ ।

यस्तै दाल तथा गेडागुडी उप–समूहको सूचकांक ५ दशमलव ५२ प्रतिशतले घटेको छ । मरमसलाको ३ दशमलव ९२ प्रतिशत र अन्य खाद्य तथा खाद्यजन्य पदार्थको ३ दशमलव ७० प्रतिशतले मूल्य घटेको उल्लेख छ ।

गैर–खाद्य तथा सेवा समूहअन्तर्गत विविध वस्तु तथा सेवा उप–समूहको वार्षिक विन्दुगत उपभोक्ता मूल्य सूचकांक २१ दशमलव ७५ प्रतिशतले बढेको छ । शिक्षामा ७ दशमलव ५६ प्रतिशत, कपडाजन्य तथा जुत्ताचप्पलमा ५ दशमलव २९ प्रतिशत, सुर्तीजन्य पदार्थमा ४ दशमलव १५ प्रतिशत र मदिराजन्य पेय पदार्थमा ३ दशमलव ८५ प्रतिशतले मूल्य वृद्धि भएको छ ।