काठमाडौँ — प्रतिनिधिसभा सदस्य निर्वाचनका लागि झापा–५ बाट उम्मेदवारी दर्ता गरी काठमाडौं फर्किने क्रममा नेकपा एमाले अध्यक्ष तथा पूर्वप्रधानमन्त्री केपी शर्मा ओलीले विराटनगर र काठमाडौं दुवै विमानस्थलमा आफू 'अपमानजनक व्यवहारको सिकार' भएको दाबी गरेका छन् ।

जेन–जी आन्दोलनपछि बन्द गरिएका देशभरका विमानस्थलका भीआईपी कक्ष नखुल्दा विमानस्थल र विशिष्ट व्यक्तिको सुरक्षामाथि बहस सुरु भएको छ ।

शनिबार च्यासलमा आयोजित कार्यक्रममा ओलीले विराटनगर विमानस्थलमा अपमानजनक व्यवहार भोग्नुपरेको सार्वजनिक अभिव्यक्ति दिएका थिए । आइतबार कान्तिपुरसँगको कुराकानीमा उनले काठमाडौं विमानस्थलमासमेत आफ्नो गाडीलाई एयरसाइड प्रवेश गर्न नदिइएको बताए । उनले ‘माथिको आदेश’ भन्दै सुरक्षाकर्मीले सुन तस्कर सरह कडाइका साथ जाँच गरेको आरोप लगाए ।

ओलीको गुनासो : सरकारले विमानस्थलमा दुःख दियो, अपमान गर्‍यो

ओलीको अभिव्यक्तिपछि विराटनगर विमानस्थल प्रमुख सुवास झाले ओली विमानस्थल प्रवेश गरेदेखि जहाज चढ्दासम्मको सीसीटीभी फुटेज नेपाल नागरिक उड्डयन प्राधिकरणका निमित्त महानिर्देशक देवचन्द्र लाल कर्णलाई पठाइएको जानकारी दिए । उनका अनुसार ओलीको शारीरिक जाँच गरिएको थिएन भने ओलीसँगै आएका आठ जना यात्रुको भने नियमित सुरक्षा जाँच गरिएको थियो ।

ओलीले विशिष्ट व्यक्तिका लागि छुट्याइएको भीआईपी कक्ष बन्द गरिएकोमा आपत्ति जनाउँदै सरकारको आलोचना गरे । सर्वसाधारण प्रवेशद्वारबाट लाइनमा उभिनुपरेको अवस्थालाई उनले ‘मजाक’ बनाइएको टिप्पणी गरे । ‘भीआईपी कक्ष छ तर प्रयोगमा छैन । भित्र बस्ने ठाउँ नहुँदा उभिनुपर्‍यो, लाइनमै बसेर शौचालय जानुपर्ने अवस्था आयो,’ ओलीले भने ।

उनका अनुसार आफू आउने जानकारी विमानस्थल प्रशासनलाई पहिल्यै गराइएको थियो । ‘अतिरिक्त सुविधा खोजेको होइन, तर अनावश्यक असुविधा भयो,’ उनले भने । यसअघि पूर्वप्रधानमन्त्री पुष्पकमल दाहाल र शेरबहादुर देउवाले पनि यस्तै अनुभव भोगेको उल्लेख गर्दै ओलीले यस्तो व्यवहार अनुचित भएको बताए ।

गत भदौको जेन–जी आन्दोलनपछि ओलीको यो पहिलो काठमाडौं बाहिरको हवाई यात्रा थियो । सोमबार उनी यति एयरलायन्सको एटीआर विमानमार्फत भद्रपुर पुगेका थिए । त्यस क्रममा काठमाडौं विमानस्थलको आन्तरिक टर्मिनलस्थित भीआईपी कक्ष प्रयोग गर्न नपाई उनी सिधै एप्रोन हुँदै जहाजमा चढेका थिए । फर्कने क्रममा विराटनगर र काठमाडौं दुवै विमानस्थलमा पूर्वप्रधानमन्त्रीले पाउने सुविधा अवरुद्ध गरिएको भन्दै उनले असन्तुष्टि व्यक्त गरे ।

ओलीले किन ‘सुरक्षा थ्रेट’ महसुस गरिरहेका छन् ?

तर विमानस्थल सुरक्षा कार्यालय, नागरिक उड्डयन कार्यालय विराटनगर र यति एयरलायन्सले ओलीको दाबीलाई तथ्यहीन बताएका छन् । ती निकायका अनुसार ओलीको शारीरिक जाँच गरिएको थिएन र उनी करिब १० मिनेट ढिलो पुगेकाले उडानसमेत ढिलाइ भएको थियो । भीआईपी यात्रुलाई अन्तिममा बोर्ड गराउने प्रावधानअनुसार उडान केही समय रोकिएको यति एयरलायन्सले जनाएको छ ।

विमानस्थलभित्र छुट्टै प्रतीक्षालय नहुँदा ओली बाहिर रहेको निजी रेष्टुरेन्टमा बसेका थिए । सबै यात्रु बोर्डिङ भइसकेपछि उनलाई बोलाइएको र सर्वसाधारण प्रयोग गर्ने वाक–थ्रु गेट हुँदै टर्मिनल प्रवेश गरी जहाज चढाइएको विमानस्थल प्रशासनले जनाएको छ । विमानस्थल प्रमुख झाले ओलीले औपचारिक रूपमा भीभीआईपी कक्षको माग नगरेको दाबी गरे ।

प्राधिकरणका एक उच्च अधिकारीका अनुसार भीआईपी कक्ष नखोल्ने निर्णय प्रधानमन्त्री र पर्यटन मन्त्रीको तहबाट आएको भनिए पनि लिखित निर्देशन भने छैन । निमित्त महानिर्देशक कर्णले ‘माथिबाट औपचारिक क्लियरेन्स नआएकाले’ भीभीआईपी कक्ष सञ्चालनमा ल्याउन नसकिएको बताए ।