काठमाडौँ — भिसा दुरुपयोग गरी गैरकानुनी रुपमा बसोबास गर्दै आएका २ विदेशी नागरिक पक्राउ परेका छन् ।  शंकास्पद क्रियाकलापमा संलग्न चिनियाँ र अमेरिकी नागरिकलाई अध्यागमन विभागले आइतबार पक्राउ गरेको हो ।

पक्राउ परेकामध्ये चिनियाँ नागरिक पकनाजोल ठमेलमा होटलमा बस्दै आएका थिए । सन् २०१२ मा पहिलोपटक पर्यटक भिसामा नेपाल प्रवेश गरेका उनी त्यसपछि पटकपटक गरी १३ पटक व्यावसायिक भिसा लिएर बसेका थिए ।

उनले नेपालमा विभिन्न ६ वटा होटेल/व्यावसायिक कम्पनीहरु स्थापना गरेको पनि खुलेको छ । व्यावसायिक भिसा लिने प्रयोजनका लागि मात्र कम्पनी स्थापना गर्ने गरेको तर लगानी र कारोबार भएको नदेखिएको अध्यागमन विभागका निर्देशक टिकाराम ढकालले जानकारी दिए ।

उनले स्थापना गरेका तर व्यावसायिक कारोबार नगरेका कम्पनीहरु यान सपिङ होटेल तथा रेस्टुराँ, होटेल विथ रेस्टुराँ यान,  झोँङविन इन्टरनेशनल कार्गो कम्पनी, मोआ यिङ होटेल तथा रेस्टुराँ,  स्प्रिट मङ्की इन्फरमेसन टेक्नोलोजी र शाव जिअसुन होटल विथ रेष्टुरेण्ट कम्पनी छन् । 

यसैगरी पर्यटक भिसा र व्यावसायिक भिसामा नेपालमा बसी विगत ४ वर्षदेखि विभिन्न शैक्षिक कामको आवरणमा धर्म क्रिश्चियन प्रचारमा संलग्न अमेरिकी नागरिक पनि पक्राउ परेका हुन् । पर्यटक भिसा र व्यावसायिक भिसाको आवरणमा भित्रिएका अमेरिकी नागरिकले पटकपटक पर्यटक भिसा र फरक फरक प्रकृतिका कम्पनीहरु दर्ता गराई लामो समय नेपाल बस्ने मात्र प्रयोजनका लागि भिसा आवेदन गर्ने गरेको पनि खुलेको छ ।