सल्यान — भारतको हिमाचल प्रदेशस्थित सोलन जिल्लाको अर्की बजारमा आगलागीसँगै सिलिन्डर विस्फोट हुँदा नौ नेपालीको मृत्यु भएको छ । सल्यानको सिद्धकुमाख गाउँपालिका–२ टाकुरा घर भएका धनबहादुर विक र काशीराम विकका परिवारको आइतबार मध्यराति ज्यान गएको हो । 

मध्यरातमा आगो लागेपछि ज्यान जोगाउन कोठाभित्र हारगुहार गरिरहँदा सिलिन्डर विस्फोट भएर उनीहरूको मृत्यु भएको नेपाली समाज भारतका महासचिव आरबी खड्काले जानकारी दिए । उनका अनुसार स्थानीय राजीव गुप्ताको घरको माथिल्लो तलामा विक परिवार सुतेका थिए भने भुइँतलाको पसलमा ग्यास सिलिन्डरलगायतका सामान थिए । पसलमा आगलागी भएपछि सिलिन्डर विस्फोट भएको थियो । 

दुर्घटनामा परी ३३ वर्षीय धनबहादुर विक, श्रीमती कविता, छोरीहरू राधा र रेनुका तथा २२ महिने छोरा राजनको मृत्यु भएको छ । ४७ वर्षीय काशीराम विक, श्रीमती टीका, छोरी अनु र छोरा किरणले पनि ज्यान गुमाएका छन् । विस्फोटमा परेका कारण उनीहरूको शव चिन्न मुस्किल पर्ने अवस्थामा रहेको घटनाका प्रत्यक्षदर्शी प्रेम विकले जानकारी दिए । ‘मेरो, राजेन्द्र विक, गंगाराम विक र अर्का एक जनाको परिवार नजिकैको घरमा सुतिरहेका थियौं । मध्यरातमा अचानक आगो लागेको थाहा पाएपछि हामी भाग्यौं,’ उनले सुनाए । 

मृतक काशीरामका भाइ मनबहादुर पनि आगलागी हुँदा नजिकैको अर्को घरमा थिए । ‘हामी सबै एकै ठाउँमा काम गर्थ्यौं । आइतबार पनि दिनभर काम गरेर साँझ ७ बजे कोठा फर्किएका थियौं, काम गरेर लखतरान भएकाले हतारहतार खाना पकाएर खाएपछि सबै सुतेका थियौं,’ मनबहादुरले सुनाए, ‘मध्यरातमा अचानक हल्लीखल्ली सुनियो, आगो लाग्यो भन्दै थिए । हामी बाहिर आउँदा दाजुहरू सुत्ने कोठा चढ्ने सिँढीमा आगो दन्किरहेको थियो ।’

पसलमा आगो सल्किरहेका बेला भित्रबाट दाजुलगायतले चिच्याइरहेको उनले सुनेका थिए । ‘आगो निभाउन पानी लिएर जाँदै गर्दा सिलिन्डर पड्किएको आवाज आयो, चिच्याइरहेका दाजु र परिवारको आवाज बन्द भयो,’ उनले भने । १०/१२ वटा सिलिन्डर विस्फोटको आवाज सुनेको मनबहादुरको भनाइ छ ।

उनका अनुसार आगलागी भएको घरमा पछाडिपट्टिको कोठामा सुतेका अरूले भने हामफालेर ज्यान जोगाएका थिए । मनबहादुरका अनुसार आगो ठूलो भएकाले स्थानीयले निभाउन सक्ने अवस्था थिएन । बिहान ६ बजेतिर मात्र दमकलसहित आएको सुरक्षाकर्मीको टोलीले आगो निभाएको थियो । त्यसपछि घटनास्थलमा शव डढेको र टुक्राटुक्रा थियो ।