काठमाडौँ — भारतीय म्यागजिन 'आउटलुक'ले सूचीबद्ध गरेको ‘गेम चेन्जर अफ हेल्थकेयर’ मा एक नेपाली चिकित्सक पनि परेका छन् ।

भारतमा घुँडाको शल्यक्रिया तथा रिप्लेसमेन्टमा परिवर्तनकारी भूमिका खेलेका ७ चिकित्सकहरूको नाम आउटलुकले पछिल्लो अंकमा प्रकाशित छ । 

त्यसमा हाडजोर्नी विशेषज्ञ डा. दीपक गौतम पनि परेका हुन् । गौतम स्याङ्जा निवासी हुन् । उनी अहिले मुम्बईस्थित एपोलो अस्पतालमा हाडजोर्नी विभाग प्रमुख हुन् ।

रोबोटको सहयोगबाट घुँडाको शल्यक्रिया तथा रिप्लेसमेन्टमा उनले अब्बल स्थान बनाएका छन् । आउटलुकले उनको त्यही कार्यलाई प्राथमिकता दिएर स्थान दिएको छ । डा. गौतमले कैयौं व्यक्तिमा सफलतापूर्वक ‘रोबोटिक नी रिप्लेसमेन्ट’ गरिसकेका छन् । नेपालको मदन पुरस्कार गुठीबाट छात्रवृत्तिमा कलकत्ताबाट एमबीबीएस गरेका उनले दिल्लीस्थित एम्सबाट एमएस सकेका हुन् । अध्ययन सकेर लामो समय एम्समै कार्य गरेका उनी अहिले मुम्बईस्थित एपोलो अस्पतालमा कार्यरत छन् ।