धनकुटा — नेपाली कम्युनिस्ट पार्टीका सह–संयोजक माधवकुमार नेपालले वर्तमान सरकारका सामु निर्वाचनबाहेक विकल्प नरहेको बताएका छन् ।

धनकुटामा पार्टीको एकता सन्देश सभालाई सम्बोधनपश्चात् कान्तिपुरसँगको कुराकानीमा नेता नेपालले सरकारले फागुन २१ का लागि तोकिएको निर्वाचनलाई केन्द्रबिन्दुमा राखेर समयमै सम्पन्न गर्ने गरी अघि बढ्नुपर्ने बताएका हुन् । 

नेता नेपालले तोकिएको मितिमा निर्वाचन गर्ने कुरामा तलमाथि नगर्न पनि सरकारको ध्यानाकर्षण गराएका छन् । नेता नेपालले भने, ‘सरकारले आगामी प्रतिनिधिसभा निर्वाचनलाई मुख्य प्राथमिकतामा राखेर मुलुकको प्रणालीगत सुधार तथा विगतका बेथिति सच्याउने कुरामा लाग्नु पर्छ ।’ जनस्तरमा निर्वाचन नहुने हो कि भन्ने द्विविधा छ नि भन्ने प्रश्नमा नेता नेपालले आफूले निर्वाचन हुँदैन भन्दै हिँड्न नहुने तर निर्वाचनका लागि वातावरण बनाउने काम सरकारको भएको जिकिर गरे ।

‘निर्वाचन हुँदैन भन्दै मैले प्रचार गर्न मिल्दैन, निर्वाचनको वातावरण बनाउने काम सरकारको हो,’ उनले भने, ‘लोकतन्त्रमा संसद् शून्यताको अवस्था स्वीकार्य हुँदैन, कुनै पनि किसिमको अधिनायकवाद आफूहरूलाई स्वीकार्य छैन, वर्तमान सरकारले निर्वाचन गराएर जनताका प्रतिनिधिलाई अविलम्ब देश जिम्मा लाउनु पर्छ ।’