'सडकमा पल्टिएको ट्यांकर क्रेनले उठाउने प्रयास गरे पनि सम्भव भएको छैन,' ट्राफिक प्रहरी निरीक्षक राजेन्द्र थापा मगरले भने, 'टयांकरबाट ग्यास लिक भएको आशंका छ, यसले झनै समस्या थपिएको छ ।'
रौतहट — चन्द्रपुर नगरपालिका-४ स्थित पूर्व-पश्चिम राजमार्गको दोस्रो लच्का नजिकै ग्यास बोकेको बुलेट ट्यांकर सडकमै पल्टिएपछि १० घन्टादेखि पूर्व-पश्चिम राजमार्ग अवरुद्ध भएको छ ।
ट्यांकरमा ग्यास भरिएकाले उठाउन कठिन भएको हो । अहिले ६ वटा क्रेन प्रयोग गरे पनि ट्यांकर उठाउन सकिएको छैन । ट्यांकर बाट ग्यास लिक भएको आशंका प्रहरीले गरेको छ ।
भारतबाट वीरगन्ज नाका हुँदै पूर्वतर्फ आउँदै गरेको यूपी १७ एपी २११४ नम्बरको एलपी ग्यास लोड बुलेट ट्रक मंगलबार बिहान साढे ७ बजे अनियन्त्रित भई सडकको बीच भागमै पल्टिएको थियो । ट्राफिक प्रहरी निरीक्षक राजेन्द्र थापा मगरले सडकमा पल्टिएको ट्यांकर उठाउन समस्या भएको बताए ।
'क्रेनले उठाउने प्रयास गरे पनि सम्भव भएको छैन,' उनले भने, 'टयांकरबाट ग्यास लिक भएको आशंका छ, यसले झनै समस्या थपिएको छ । सडक सुचारु हुन अझै केही समय लाग्ने देखिन्छ ।'
अहिले यस क्षेत्रमा सवारी आवागमनमा समस्या भएको प्रहरीले जनाएको छ । दुर्घटनामा परी भारतको कदोरमा थाना जयनगरका ३७ वर्षीय चालक पवन यादव घाइते भएका छन् । उनको बायाँ काँध र हातमा चोट लागेको प्रहरीले जनाएको छ । चालक यादवको चन्द्रपुरस्थित सिभिल अस्पतालमा उपचार भइरहेको छ ।
बिहानदेखि राजमार्ग दुईतर्फी अवरोध भएको छ । अहिले केही सानाठूला सवारीसाधन धन्सार पुल नजिक हुँदै नहर मार्गबाट फाट्टफुट्ट आवतजावत गरिरहेका छन् ।
