धनकुटा — जेन–जी प्रदर्शनका क्रममा जलेर नष्ट भएको एमाले अध्यक्ष केपी शर्मा ओलीको तेह्रथुमस्थित पुर्ख्यौर्ली घर पुरानै शैलीमा बनाउन लागिएको छ ।

आठराई गाउँपालिका–५ स्थित इवा गाउँमा रहेको अध्यक्ष ओलीको पुर्ख्यौली घर गत भदौ २४ मा प्रदर्शनकारीको आगजनीमा नष्ट भएको थियो । अहिले जलेको घरको भग्नावशेष हटाएर सोही ठाउँमा नयाँ घर बनाइरहेको एमाले तेह्रथुमका अध्यक्ष शिवप्रसाद ढुंगानाले जानकारी दिए । 

अध्यक्ष ओलीको मौखिक स्वीकृतीपछि युवासंघ नेपाल, एमाले जिल्ला र गाउँकमिटिको व्यवस्थापन तथा रेखदेखमा पुरानै शैलीमा ओलीका लागि नयाँ घर बनाउन लागिएको उनले बताए । नयाँ घरमा सिकुवा, बरण्डा, भान्छा र सुत्ने–बस्ने कोठा बनाइने ढुंगानाले बताए । ढुंगामाटो र काठ प्रयोग गरेर पुरानै डिजाइनमा खरको छाना लगाइने उनले सुनाए ।  ‘अध्यक्षज्यूका लागि पुरानै स्वरुप र आकारप्रकारमा नयाँ घर बनाउँदै छौं,’ ढुंगानाले भने, ‘अध्यक्षज्यूको घर केवल ढुङ्गामाटोबाट बनेको प्रतिमा मात्रै थिएन, इतिहास र राजनीतिको धरोहर थियो, पहिलेको नासिए पनि इतिहास जोगाइराख्न नयाँ  घर बनाउने टुंगोमा पुगेका हौं ।’