२०६५ सालदेखि संग्रहालय बनेको नारायणहिटी दरबारमा १७ वर्षको अवधिमा स्वदेशी तथा विदेशी गरी कुल ४७ लाख ७७ हजारभन्दा बढीले अवलोकन गरेका छन् ।
काठमाडौँ — शाहवंशीय राजतन्त्रको अन्त्यसँगै नारायणहिटी राजदरबार १७ वर्षअघि सङ्ग्रहालयमा परिणत गरियो ।
२०६५ असार १ गते तत्कालीन प्रधानमन्त्री गिरिजाप्रसाद कोइरालाले विधिवत् रुपमा नारायणहिटी दरबार सङ्ग्रहालयको रुपमा समुद्घाटन गरे पनि फागुन १५ देखि सर्वसाधारणका लागि खुला गरिएको थियो । स्थापनाको १७ वर्षमा सो सङ्ग्रहालय ४७ लाख ७७ हजार ७०० स्वदेशी तथा विदेशी पर्यटकले अवलोकन गरेका छन् ।
स्थापनादेखि गत मङ्सिर मसान्तसम्म उक्त सङ्ख्याका पर्यटकले सङ्ग्रहालय अवलोकन गरेका हुन् । आर्थिक वर्ष २०८१/८२ मा दुई लाख ६० हजारले नारायणहिटी दरबार सङ्ग्रहालयको अवलोकन गरेकोमा चालु आवको साउनदेखि मङ्सिर मसान्तसम्म ४६ हजार ७०० ले अवलोकन गरेको नारायणहिटी दरबार सङ्ग्रहालय तथा गणतन्त्र स्मारक व्यवस्थापन तथा सञ्चालन विकास समितिका सूचना अधिकारी पुरुषोत्तम थापाले जानकारी दिए ।
सरकारले सङ्ग्रहालय प्रवेशका लागि विद्यार्थीलाई ५०, नेपालीलाई २००, सार्क राष्ट्रका नागरिकलाई ५०० र विदेशी नागरिकलाई रु एक हजार शुल्क लिँदै आएको छ ।
सङ्ग्रहालय प्रत्येक हप्ताको मङ्गलबार, बुधबार बन्द रहँदै आएको छ भने शनिबार र अन्य बिदाको दिनमा भने खुल्ला रहन्छ ।
