काठमाडौँ — सरकारका प्रवक्ता सूचना, सञ्चार तथा प्रविधिमन्त्री जगदीश खरेलले २१ फागुनमा प्रतिनिधिसभा निर्वाचन हुनेमा कुनै शंका नपाल्न आग्रह गरेका छन् ।

सरकार, निर्वाचन आयोग र सुरक्षा निकाय सबै कार्ययोजना बनाएर चुनावी तयारीमा लागिरहेको उनले उल्लेख गरेका छन् ।

निर्वाचन आयोग कार्यालयमा आयोगका पदाधिकारी तथा कर्मचारीहरूसँगको अन्तर्क्रियामा मन्त्री खरेलले राजनीतिक दल पनि चुनावी तयारीमा जुटिसकेकाले निर्वाचन अब महोत्सवमा परिणत हुन लागेको बताए । ‘छोटो समयमा आयोगले महत्त्वपूर्ण तयारीहरू पूरा गरेको छ । सबै सरोकारवाला पक्षहरू निर्वाचनको महोत्सवमा समाहित हुँदै गएका छन् । यसले सकारात्मक माहोल निर्माण गरेको छ,’ उनले भने, ‘मतदाता नामावलीमा नाम दर्ता गराउन लाखौं मतदातामा देखिएको उत्साहले जनता पनि चुनावका लागि तयार रहेको सन्देश दिइसकेको छ ।’ उनले निर्वाचनलाई आवश्यक राजनीतिक, कानुनी र प्राविधिक वातावरण बनाउन सरकार प्रतिबद्ध रहेको उल्लेख गरे । 

राजनीतिक दलको सहभागिता बिनाको सरकार तथा संवैधानिक निकाय निर्वाचन आयोगले कसैको प्रभाव र दबाब बिना भयरहित वातावरणमा स्वतन्त्र र निष्पक्ष चुनाव गराउनेमा ढुक्क हुन उनले आग्रहसमेत गरे । निर्वाचनका लागि आवश्यक पर्ने हरेक किसिमको सहयोग आयोगलाई उपलब्ध गराउन सरकार प्रतिबद्ध रहेको उनको भनाइ थियो । 

उनले निर्वाचन अत्यन्तै महँगो हुँदै गएकोमा चिन्ता व्यक्त गरे । ‘पैसा नहुने मानिस उम्मेदवार नै नहुने, उम्मेदवार भए जित्नै नसक्ने स्थिति बनेको छ,’ आयोग पदाधिकारीलाई उनको आग्रह थियो, ‘यसलाई कसरी कडाइका साथ नियन्त्रण गर्न सकिन्छ । यसपटक गरौं । सरकारको साथ रहन्छ ।’ भ्रष्टाचारको मूल जड निर्वाचन महँगो हुनु पनि रहेको उनको भनाइ थियो । उनले यसपटकको निर्वाचनलाई एउटा मानकका रूपमा स्थापित गरेर जान सकिने गरिने आचार संहिताको पालनामा कडाइ गर्न आग्रह गरेका थिए । बढीभन्दा  बढी मतदातालाई मतदान केन्द्रमा ल्याउन तथा मतदाता मैत्री मतदान केन्द्र निर्माणमा जोड दिन उनले आयोगको ध्यानाकर्षण गराए । मतदान केन्द्रमा मतदाताले प्रयोग गर्न मिल्ने गरी शौचालय, अपांगतामैत्री वातावरण लगायतका व्यवस्थापन गर्न उनले आयोगलाई आग्रह गरे ।