काठमाडौँ — जबर्जस्ती करणीबाट गर्भ रहेपछि न्याय माग्दै सुर्खेतबाट २५ वर्षीया एक महिला काठमाडौं आएकी छन् । दार्चुलाका भूपेन्द्रसिंह ठगुन्नाले आफूमाथि जबर्जस्ती करणी गरेको उनको आरोप छ । सात महिनाकी गर्भवती उनी काठमाडौं आएलगत्तै माइतीघरमा मंसिर २५ देखि २७ गतेसम्म अनशन बसेकी थिइन् । ठगुन्नामाथि कारबाही हुनुपर्ने र शिशुको अधिकार सुरक्षित गर्नुपर्ने माग राख्दै उनी अनशनमा बसेकी थिइन् ।

तर, अनशनमा बस्दा पेटको बच्चा चल्न छोडेपछि प्रहरीले गत आइतबार थापाथलीस्थित परोपकार प्रसूति तथा स्त्रीरोग अस्पताल पुर्‍याएको थियो । 

सामाजिक सञ्जालबाट चिनजानी हुँदै उनीहरू चार वर्षअघि काठमाडौंमा भेटेका थिए । ‘म काठमाडौंमा बसेर ब्याचलर पढ्दै थिएँ, त्यहीबेला हाम्रो भेट भएको हो,’ ती महिलाले कान्तिपुरसँग भनिन् । काठमाडौं छाडेर सुर्खेत गएपछि त्यहाँ पनि ठगुन्ना कोठामै आएर बारम्बार हातपात तथा बलात्कार गर्ने गरेको उनको दाबी छ ।

दुई वर्षअघि राष्ट्रिय मानवअधिकार आयोगमार्फत उनले सुर्खेतस्थित जिल्ला र उच्च दुवै अदालतमा जबर्जस्ती करणीको मुद्दा दायर गरेकी थिइन् । दुवै अदालतले ठगुन्नालाई सफाइ दियो । त्यसपछि पनि ठगुन्नाले आफूमाथि निरन्तर हिंसा गर्न नछाडेको ती महिलाको दाबी छ ।

गर्भ बसेपछि उनले पुनः न्याय माग्दै सरकारी वकिलको कार्यालय, मानवअधिकार आयोग र महिला आयोग जस्ता निकायमा हारगुहार गरिन् । ‘तर कतैबाट न्याय नपाएपछि अनशन बस्न बाध्य भएकी हुँ,’ महिला भन्छिन्, ‘पहुँच र शक्तिको आडमा मलाई धम्काउने, डर देखाउने गरेका छन्, उसको परिवारबाट मार्नेसम्मको धम्की आइरहन्छ ।’ न्याय नपाएसम्म सडकबाटै आफू लडिरहने बताउँदै उनी थप्छिन्, ‘म मरे मर्छु तर ऊ जेल नजाउन्जेल सडकमा नै लडिरहन्छु ।’

थापाथलीस्थित प्रसूति अस्पतालका प्रवक्ता सुकुमाया लामाले हाल उनी र गर्भ दुवैको स्वास्थ्य अवस्था सन्तोषजनक रहेको जानकारी दिइन् । सुर्खेत जिल्ला प्रहरी निरीक्षक दीपक मंग्रातीका अनुसार एक वर्ष अगाडि दुवै जना ‘लिभिङ टुगेदर’मा बसेको देखिन्छ ।