काठमाडौँ — न्यायाधीश समाजले पछिल्ला दिनहरुमा सामाजिक सञ्जालसहित सार्वजनिक रुपमा न्यायाधीशहरुमाथि पूर्वाग्रहपूर्ण र प्रतिशोधको आधारमा टिप्पणी हुन थालेको भन्दै आपत्ति प्रकट गरेको छ ।

समाजले आइतबार एक विज्ञप्ति जारी गर्दै आदेश वा फैसला गरेकै आधारमा र सत्य तथ्यभन्दा बाहिर गएर न्यायाधीशको आलोचना र टिप्पणी गर्ने कामले न्यायालयलाई नै क्षति पुग्ने भनेको छ । 

‘पछिल्ला समय भइरहेको टिप्पणी र आलोचनाहरु हेर्दा सुधारको भावनाबाट प्रेरित रहेको भन्दा पनि पूर्वाग्रहपूर्ण, प्रतिशोधपूर्ण र तथ्यहीन रहेको देखिन्छ । यस्तो व्यवहारले न्याय सम्पादनको कार्यमा प्रभावकारिता वृद्धि गर्दैन,’ विज्ञप्तिमा भनिएको छ, ‘बरु नागरिकको निष्पक्ष र भयमुक्त वातावरणमा न्याय पाउने हकअधिकारमाथि नै प्रत्यक्ष खतरा उत्पन्न गर्दछ ।’ 

समाजले न्यायपालिका आम जनताको आशाको अन्तिम धरोहर हो भन्ने कुरालाई बिर्सन नहुने भन्दै न्यायपालिकाबाट न्याय सम्पादनको जिम्मेवारी निर्वाह गर्दा मुद्दाका दुवै पक्षलाई जिताउन नसकिने उल्लेख छ । 

‘न्यायका लागि अदालतमा प्रवेश गरेका पक्षहरु मध्ये एउटा पक्षले हार्ने र अर्को पक्षले जित्ने हुन्छ नै तर हार्ने पक्षहरु सबैलाई अदालत पीडितको रुपमा चित्रण गरिने कुरा न्यायिक मर्यादा भित्रको कुरा हुन सक्दैन,’ विज्ञप्तिमा भनिएको छ, ‘अनियमितता भएको भए सोसम्बन्धी जाँचबुझ गर्न अधिकार प्राप्त निकायमा उजुर गर्न सकिने नै हुन्छ तर तथ्ययुक्त रुपमा उजुर पनि नगर्ने अनि प्रत्येक हारको स्थितिलाई अनियमितताको रुप दिने व्यवहारले आम जनसमुदायको आस्थाको पुञ्ज हुनु पर्ने न्यायपालिकाको गरिमा र पवित्रतामा आँच मात्र पुर्‍याउने काम गर्छ भन्ने यो समाजको धारणा रहेको छ ।’