सरकारले संघीय संसद्लाई आफूमातहतको कुनै एउटा शाखाको जस्तो व्यवहार गर्नु उचित नभएको सभामुख घिमिरेको भनाइ
काठमाडौँ — सभामुख देवराज घिमिरेले संघीय संसद्लाई बन्देज लगाउने प्रयास गरिरहेको आरोप लगाएका छन् । संघीय संसद सचिवालय दिवसको अवसरमा आइतबार काठमाडौंमा आयोजित एक कार्यक्रममा उनले प्रतिनिधिसभा विघटनको सान्दर्भिकता नभएको जिकिरसमेत गरे ।
सभामुख घिमिरेले सरकारले संसद् सचिवालयका कर्मचारीहरूको सेवा, सुविधा र दरबन्दी घटाउने कामप्रति पनि असन्तुष्टि व्यक्त गरे । सरकारले संघीय संसद्लाई आफूमातहतको कुनै एउटा शाखाको जस्तो व्यवहार गर्नु उचित नभएको सभामुख घिमिरेको भनाइ थियो ।
सभामुख घिमिरेको भनाइ
२७ भदौमा गएर संसद्लाई नै विघटन गरिएको छ । यसको सोझो सान्दर्भिकता देखिँदैन र छैन । यो संसदीय व्यवस्थामाथिको प्रहार हो । पछिल्लो समय सरकारले संसद् र यसको सचिवालयमाथि आर्थिक र प्रशासनिक रूपमा अदृष्य बन्देज लगाउने प्रयास गरिरहेको छ । म सभामुखको हैसियतले स्पष्ट शब्दमा भन्न चाहन्छु–संसद्को सरकारको अधिनमा रहने कुनै एउटा शाखा होइन र हुन सक्दैन ।
शक्ति पृथकीकरणको सिद्धान्तअनुसार संसद् आफैंमा पूर्ण स्वायत्त निकाय हो । संसद्को बजेटमा अर्थ मन्त्रालयले कैँची चलाउनु, कर्मचारीको सेवा, सुविधा र दरबन्दीमा प्रशासनिक बाधा पुर्याउनु भनेको अप्रत्यक्ष रूपमा व्यवस्थापिकालाई कार्यकारीले नियन्त्रण गर्ने उल्टो प्रयास हो ।
संसद्को आर्थिक र प्रशासनिक साँचो सरकारको हातमा मात्रै हुने हो भने यो संसद्ले कसरी सरकारमाथि निष्पक्ष निगरानी र सन्तुलित कामहरू गर्न सक्दछ ? यो अहिले तत्काल छलफल, बहस र तुरुन्त कार्यान्वयनमा सुधार गर्नुपर्ने विषय हो भन्ने कुरा म राख्न चाहन्छु ।
