गोरखा — धार्चे–२ रुन्चेत स्थित गण्डकी माविको प्राङ्गण मंगलबार सदाको दिन भन्दा भिन्न थियो । विद्यार्थी, अभिभावक हातमा खादा माला लिएर ३७ वर्षसम्म कखरा सिकाउने ‘हेडसर’ इन्द्र बहादुर उपरकोटीलाई बिदाई गर्न लामबद्ध थिए ।

सेवा निवृत्त बनेका उपरकोटीको बिदाई भिन्न पनि थियो । झण्डै ४ दशक दुर्गमका बालबालिकालाई आकाश चुम्ने लक्ष्य लिन सिकाउने ‘हेडसर’ उपरकोटीलाई हेलिकप्टरमा चढाएर विद्यार्थी र अभिभावकले बिदाईको हात हल्लाए । २०४५ फागुन १९ गते स्थापना भएको विद्यालयलाई प्रावि, निमावि हुँदै ३ वर्षअघि माविसम्म बनाउन उपरकोटी सफल बनेका थिए । 

३७ वर्ष लगातार प्रध्यानाध्यापक बनेका उपरकोटीको सम्मान स्वरुप हेलिकप्टर उडाएर बिदाई गरिएको विद्यालय व्यवस्थापन समितिका अध्यक्ष प्रताप गुरुङले बताए । ‘हाम्रो तीन पुस्ता उहाँले पढाउनुभयो,’ उनले भने, ‘भूतपूर्व विद्यार्थी र अभिभावले उहाँको बिदाई कसरी गर्ने भन्ने सल्लाह गरेरर हेलिकप्टरको व्यवस्थापन मिलाएका हौं ।’