विराटनगर — विराटनगरको कोशी अस्पतालको अस्तव्यस्त भीड छिचोल्दै उर्लाबारीका सञ्जय दर्जी एउटा त्रिपाल टाँगिएको ठाउँतिर लाग्छन् । त्यहाँ बाँडिरहेको निःशुल्क खाना पाएपछि नजिकैको मेचमा बस्छन् र कपाकप खान थाल्छन् । पेटभरि खाएपछि उनी फेरि आईसीयूमा उपचाररत मामा टंक दर्जीको रेखदेखमा फर्किन्छन् ।

सञ्जयका लागि यो एक छाकको खाना दैनिक चिन्तामाथिको ठूलो राहत हो । ‘अहिलेको समयमा पैसाबिनै भात पाउनु हामीजस्ताका लागि ठूलो कुरा हो,’ उनी कृतज्ञ हुँदै भन्छन्, ‘जसले यो सेवा गरिरहेको छ, महान् छ ।’

यिनै सञ्जयजस्ता विपन्न कुरुवाहरूका लागि २ वर्षदेखि कोशी अस्पताल परिसरमा निःशुल्क खाना बाँडिँदै आएको छ । यो कार्यको अगुवाइ विराटनगर–१० तीनटोलियाका परोपकारी नागरिक पृथ्वीकुमार अग्रवालले गर्दै आएका छन् ।

अग्रवालले २०८० असोज २८ देखि अस्पतालमा उपचाररत बिरामीका कुरुवा र आवश्यक परे स्वयं बिरामीलाई पनि दैनिक एक छाक शुद्ध, सादा र मिठो भोजन उपलब्ध गराउँदै आएका छन् । उनको पहलमा स्थापित सामाजिक संस्था ‘नरसेवा नारायण सेवा’ का सदस्यहरू हरेक बिहान जुटेर यो सेवालाई निरन्तर चलाएको २ वर्ष पुगिसकेको छ ।

‘केही वर्षअघि जब कोशी अस्पताल पुगें, अस्पतालको आँगनमा भेटिएका कुरुवाहरूको पीडाले मन छोयो,’ अग्रवाल सुनाउँछन्, ‘कतिसँग उपचार खर्च थिएन । कतिसँग खाना खाने पैसा पनि थिएन । त्यसपछि विपन्न परिवारलाई निःशुल्क खाना खुवाउने संकल्प गरें ।’