काठमाडौँ — प्रतिनिधिसभा विघटनविरुद्ध दायर निवेदनमा सुनुवाइ धकेलिएको छ । बुधबार संवैधानिक इजलासमा हुने भनिएको सुनुवाइ सबै विपक्षीको लिखित जवाफ पेस नभएका कारण सरेको हो ।

रिट निवेदकमध्येका एक अधिवक्ता प्रेमराज सिलवालले पेसी स्थगित भएको र मंसिर २२ का लागि नयाँ पेसी तोकिएको जानकारी दिए । कात्तिक १२ गते सर्वोच्च अदालतको संवैधानिक इजलासले  ७ दिनभित्र लिखित जवाफ पेस गर्न विपक्षीको नाममा आदेश गरेको थियो । सर्वोच्चले सुरुमा सात दिन र थमाउने म्याद सात दिन गरी १५ दिनभित्र लिखित जवाफ पेस गर्ने समय दिएको थियो ।

सर्वोच्चले लिखित जवाफ सबै पक्षको दर्ता भएपछि अन्तिम सुनुवाइ गर्ने आदेशमा भनेको थियो । तर हालसम्म सबैको लिखित जवाफ दर्ता नभएकाले अन्तिम सुनुवाइको पेसी सरेको हो । प्रतिनिधिसभा विघटनविरुद्ध १७ थान रिट निवेदन दर्ता भएका छन् । यी रिटमा प्रारम्भिक सुनुवाइ भए पनि दोस्रो सुनुवाइ हुन सकेको छैन । सर्वोच्च अदालतको संवैधानिक इजलासले तत्काल अन्तरिम आदेश दिन अस्वीकार गरे पनि महान्यायाधिवक्ताको कार्यालयमार्फत लिखित जवाफ पेस गर्न  भने आदेश गरेको थियो ।  

रिटमा राष्ट्रपतिको कार्यालय र प्रधानमन्त्री कार्यालय लगायतलाई विपक्षी बनाइएको थियो ।  इजलासले रिटमाथिको अन्तिम सुनुवाइ हुँदा नै निवेदकको मागमा विचार गर्न सकिने भनेको छ ।