काठमाडौँ — डिभिजन वन कार्यालय भोजपुरका प्रमुख (अधिकृत दसाैं) दानबहादुर श्रेष्ठविरुद्ध भ्रष्टाचार मुद्दा दायर भएको छ ।

पदको दुरुपयोग गरी गैरकानुनी सम्पत्ति आर्जन गरेको अभियोगमा अख्तियार दुरुपयोग अनुसन्धान आयोगले सोमबार डेढ करोड रुपैयाँ बिगो कायम गरी विशेष अदालतमा मुद्दा दायर गरेको हो । श्रेष्ठविरुद्ध १ करोड ४३ लाख १८ हजार ९ सय ३७ रुपैयाँ बिगो कायम गरी बिगोबमोजिम जरिवाना, स्रोत नखुलेको सम्पत्ति र यसबाट बढेबढाइएको चलअचल सम्पत्ति जफतको मागदाबी लिइएको छ ।

डिभिजन वन अधिकृतका रुपमा डिभिजन वन कार्यालय, भोजपुरमा कार्यरत श्रेष्ठबिरुद्ध इलाममा कार्यरत रहेका बेला अख्तियारमा उजुरी परेको थियो । पदीय अख्तियारीको दुरुपयोग गरी गैरकानुनी रुपमा सम्पत्ति आर्जन गरेको उजुरीपछि अख्तियारले श्रेष्ठको सरकारी सेवा प्रवेशयताको सम्पत्ति अनुसन्धान दायरामा ल्याएको थियो । त्यस क्रममा श्रेष्ठ सरकारी सेवा प्रवेश गरेको २६ असार २०४८ देखि १६ फागुन २०८० को ३२ वर्षको सम्पत्ति अनुसन्धान दायरामा ल्याइएकामा यस अवधिको स्रोत नखुलेको सम्पत्तिलाई बिगो कायम गरी मुद्दा दायर गरिएको अख्तियार प्रवक्ता राजेन्द्रकुमार पौडेलले जानकारी दिए ।

श्रेष्ठले र निज र निजको एकाघर परिवारका सदस्यले उक्त अवधिमा २ करोड १६ लाख ८५ हजार ५५७ रुपैयाँ ९६ पैसा मात्र आय आर्जन गरेको र व्ययतर्फ ३ करोड ६० लाख ४ हजार ४९५ रुपैयाँ ४८ पैसा खर्च गरेकाे देखिएकाे छ । 'आयभन्दा व्यय १ करोड ४३ लाख १८ हजार ९ सय ३७ रुपैयाँ ५२ पैसा बढी भई स्रोत पुष्टि हुन सकेन,’ अख्तियारले दायर गरेको अभियोगपत्रमा उल्लेख छ ।