काठमाडौँ — २३ र २४ भदौमा प्रदर्शनका क्रममा ज्यान गुमाएका ७६ मध्ये ५३ जनाको परिवारलाई १५ लाखको दरले आर्थिक सहायता उपलब्ध गराइएको छ । अघिल्लो दिन २२ आन्दोलनकारी र भोलिपल्ट ४१ प्रदर्शनकारी, १० कैदीबन्दी तथा ३ प्रहरीको मृत्यु भएको थियो ।

मृतकमध्ये सनाखत नभएका, कैदीबन्दी र विदेशी नागरिक गरी २३ जनाको परिवारलाई भने आर्थिक सहायता उपलब्ध गराइएको छैन ।गृह मन्त्रालयका उपसचिव रवीन्द्र आचार्यका अनुसार जिल्ला प्रशासन कार्यालयमार्फत ५३ मृतकका परिवारलाई गरी ७ करोड ९५ लाख वितरण भएको छ । 

मृतकमध्ये काठमाडौं चुच्चेपाटी, धरान र विराटनगरका भाटभटेनी स्टोरमा जलेका अवस्थामा भेटिएका १२ जनाको शव सनाखत हुन सकेको छैन । परिवार पहिचान नभएका कारण राहत उपलब्ध नगराइएको उनको भनाइ छ । बाँकेको बाल सुधार गृह, रामेछाप र धादिङ कारागारबाट भाग्ने क्रममा मृत्यु भएका १० जनाको परिवार र काठमाडौंको एक होटलबाट भाग्ने क्रममा लडेर मृत्यु भएकी भारतीय महिलाको परिवारलाई पनि राहत रकम उपलब्ध नगराएको आचार्यले बताए ।

मन्त्रिपरिषद् बैठकले ३० भदौमा मृतक नेपाली नागरिकका परिवारलाई १० लाख आर्थिक सहायता र ५ लाखका दरले काजकिरियालगायत थप खर्च दिने निर्णय गरेको थियो । स्वास्थ्य तथा जनसंख्या मन्त्रालयका प्रवक्ता प्रकाश बुढाथोकीका अनुसार घाइतेले अस्पतालबाट उपचार सेवा लिने र त्यसको खर्च विवरण अस्पतालले मन्त्रालयमा पठाउने गरी काम भइरहेको छ ।

केही घाइते अझै अस्पतालमा उपचाररत रहेकाले खर्च रकम अहिल्यै यकिन हुन नसक्ने उनको भनाइ छ । भैपरी खर्चबापत प्रत्येक घाइतेलाई २० हजारका दरले रकम भने दिइएको छ । मन्त्रालयका अनुसार २३ र २४ भदौमा गरी २५ सय ७१ जना घाइते उपचारका लागि अस्पताल आएका थिए । उनीहरूको भैपरी खर्चबापत सरकारले साढे ४८ लाख रुपैयाँ निकासा गरेको छ ।