कपिलवस्तु — कांग्रेस महामन्त्रीद्वय गगन थापा र विश्वप्रकाश शर्माले सके नियमित नसके विशेष महाधिवेशनको माग गरेका बेला कपिलवस्तु कांग्रेसका ७२ प्रतिशतभन्दा बढी महाधिवेशन प्रतिनिधिले विशेष महाधिवेशनका पक्षमा हस्ताक्षर गरेका छन् ।

उनीहरुले अहिले पार्टी यथास्थितिमा सञ्चालन हुन नसक्ने भन्दै विशेष महाधिवेशनका पक्षमा हस्ताक्षर गरेका हुन् । जिल्लाका तीन निर्वाचन क्षेत्रमा कायम रहेका ६९ महाधिवेशन प्रतिनिधिमध्ये ५० जनाले विशेष महाधिवेशन माग गरेका हुन् । अहिलेको अवस्थालाई मध्यनजर गरी समसामयिक परिस्थिति, नीति, विधान र संरचनात्मक परिर्वतनसहित नेतृत्व लगायतको विषयमा विशेष निर्णयको अपरिहार्यता रहेको भन्दै पार्टीको विधान २०१७ (संशोधितसहित) को धारा १७ को उपधारा २ बमोजिम विशेष महाधिवेशन आह्वान गर्न हस्ताक्षरमार्फत माग गरिएको हो । 

कपिलवस्तु कांग्रेसको १४ औं जिल्ला अधिवेशनमा जिल्लाका तीन निर्वाचन क्षेत्रमा कुल ७७ जना महाधिवेशन प्रतिनिधि रहेकोमा ३ महाधिवेशन प्रतिनिधिको मृत्यु भएको र ५ महाधिवेशन प्रतिनिधि अन्य पार्टीमा गएकाले अहिले जिल्लामा ६९ जना महाधिवेशन प्रतिनिधि कायम रहेको पार्टी जिल्ला सभापति अब्दुल कलामले बताए । 

जिल्लाको निर्वाचन क्षेत्र नं. १ मा कायम रहेका २५ महाधिवेशन प्रतिनिधिमध्ये १४ जनाले विशेष महाधिवेशनका पक्षमा हस्ताक्षर गरेका छन् । त्यसैगरी निर्वाचन क्षेत्र नं. २ मा कायम रहेका २३ महाधिवेशन प्रतिनिधिमध्ये २० जनाले हस्ताक्षर गरेका छन् । क्षेत्र नम्बर २ मा हस्ताक्षर गर्नेमा महाधिवेशन प्रतिनिधिको संख्या प्रदेश महामन्त्री सुरेन्द्रराज आचार्य र जिल्ला सभापति अब्दुल कलामसहित २० रहेको छ । यस्तै, क्षेत्र नं. ३ मा कायम २१ जना महाधिवेशन प्रतिनिधिमा १६ जनाले हस्ताक्षर गरेका छन् ।