आयोगले एक विज्ञप्ति जारी गर्दै राजनीतिक दलसहित व्यक्तिगत सम्पत्तिमा भएको क्षति इमेलमार्फत पठाउन अनुरोध गरेको हो ।
काठमाडौँ — जेन-जी घटनासम्बन्धी जाँचबुझ आयोगले भदौ २३ र २४ गते भएको प्रदर्शनका क्रममा काठमाडौंलगायत मुलुकका विभिन्न भागमा राजनीतिक दल, संघसंस्था र व्यक्तिगत सम्पत्तिमा भएको क्षतिको यथार्थ विवरण उपलब्ध गराउन अनुरोध गरेको छ ।
आयोगले एक विज्ञप्ति जारी गर्दै राजनीतिक दलसहित व्यक्तिगत सम्पत्तिमा भएको क्षति इमेलमार्फत पठाउन अनुरोध गरेको हो । आयोगले यसका लागि निश्चित ढाँचा पनि तोकेको छ । तोकिएको बमोजिमको ढाँचामा आयोगको इमेल ठेगाना sept8and9incident.ic@gmail.com मा पठाउन भनिएको छ । साथै घटनालाई पुष्ट्याई गर्ने प्रमाणहरु जस्तै श्रव्य-दृश्य, फोटो र कागजातहरु भए सो समेत यस आयोगमा उपलब्ध गराउन हुन अनुरोध गरेको छ ।
हुलाकमार्फत पनि क्षतिको विवरण पठाउन सकिनेछ । हुलाकबाट पठाएको क्षतिको विवरणको सफ्टकपि आयोगको इमेल ठेगानामा अनिवार्य पठाउन आयोगले अनुरोध गरेको छ ।
आयोगका प्रवक्ता विज्ञानराज शर्माले क्षतिको आकलनसहित घटनाको अनुसन्धानका लागि यस्तो विवरण माग गरिएको बताए ।
