काठमाडौँ — सामाजिक सञ्जाल टिकटकमा अहिले ९ अक्टोबर (२२ असोज) मा जेन–जीले अर्को प्रदर्शन गर्ने सूचना फैलिइरहेको छ ।

२३ र २४ भदौको जेन–जी आन्दोलनपछि पूर्वप्रधानन्यायाधीश कार्कीको नेतृत्वमा नागरिक सरकार गठन भएर मुलुक चुनावको बाटोमा हिँडिरहेका बेला फेरि प्रदर्शनको सूचना आएपछि धेरैले चासो देखाएका छन् । तर, जेन–जीको कुनै पनि पक्षले यो प्रदर्शन घोषणाको स्वामित्व लिएका छैनन् ।

शनिबार मन्त्रीहरूसहित भएको बालुवाटार बैठकमा सहभागी सुदन गुरुङले आफूहरूको माग पूरा नभए फेरि आन्दोलन गर्ने चेतावनी दिएका छन् । तर, उनी पक्षका जेन–जीहरूले समेत अर्को सडक आन्दोलन घोषणा नगरिएको बताएका छन् । जेन–जी अगुवा पुरुषोत्तम यादवले ९ अक्टोबरमा कुनै प्रदर्शन वा भेला हुने कार्यक्रम नभएको बताए ।

‘त्यसबारे हामीले एउटा सूचनासमेत जारी गरेर भनिसकेका छौं,’ उनले भने, ‘त्यसैले त्यस्तो सूचना प्रवाह भइरहेको छ भने त्यो गलत हो ।’ सामाजिक सञ्जालमा अर्को प्रदर्शनको सूचना भाइरल भएपछि २३ भदौको आन्दोलन घोषणा भएको सुरुवाततिर सामाजिक सञ्जालमा देखिएका मिराज ढुंगानाले समेत खण्डन गर्दै भिडियो सार्वजनिक गरेका छन् ।

‘धेरैले ९ अक्टोबरमा फेरि प्रदर्शन कि छैन भनेर सोध्नुभएको थियो, तर हिंसा हुने किसिमको कुनै पनि आन्दोलनमा हाम्रो संलग्नता हुनेछैन,’ उनले भनेका छन्, ‘८ तारिखमा भएको आन्दोलनमा मुसो मार्न गएका हामीले बाघ मारेर ल्यायौं– एजेन्डाबिना, के गर्ने त्यसपछि भन्ने थाहा नपाई कुनै पनि प्रदर्शनमा हाम्रो संलग्नता हुनेछैन । एक हिसाबले बनिसकेको शान्ति हामी फेरि भंग गर्नेवाला पनि छैनौं । अहिले प्रदर्शन गर्नुपर्ने कुनै कारण पनि छैन ।’ आफूहरूको माग पूरा नहुँदा सुरुमा प्रेसर दिनुनपर्ने भन्दै उनले भनेका छन्, ‘अहिले तोडफोड गर्नुपर्ने, आक्रोशमा आउनुपर्ने केही कुरा छैन । बेकारमा हिंसा गर्ने काम मात्र हामी गर्नेवाला छैनौं ।’