काभ्रे — जिल्लास्थित अरनिको र बीपी राजमार्गमा यातायात सञ्चालनमा रोक लगाइएको छ। वर्षाका कारण अहिले बीपी राजमार्गका चार स्थानमा पहिरो झरिरहेको जिल्ला ट्राफिक प्रहरी कार्यालय काभ्रेले जनाएको छ।

कार्यालयका प्रमुख प्रहरी निरीक्षक सुनिल धाँजुका अनुसार जिल्लास्थित बीपी राजमार्गअन्तर्गत भकुण्डे–नेपालथोक सडक खण्डका चार स्थानमा पहिरो झरेको छ।

‘सो सडक खण्डअन्तर्गत रोशी गाउँपालिका–१२ मा पहिरो झरेको छ,’ उनले भने, ‘त्यस्तै रोशी गाउँपालिका–९ स्थित पिन्थली, मंगलटार चार्जिङ स्टेसन र नार्के उकालोमा लेदोसहितको पहिरो झरेको छ।’

उनका अनुसार अहिले सो सडकखण्डअन्तर्गत रोशी खोलामा पानीको बहाव उच्च रहेको छ। सोही अवस्थालाई मध्यनजर गर्दै जिल्ला प्रशासन कार्यालय काभ्रेले शनिबार बिहान ९ बजेदेखि बीपी राजमार्गमा यातायात सञ्चालनमा रोक लगाएको छ।