काठमाडौँ — जेन-जी आन्दोलनपछि पनि मुख्य दलका नेतृत्व र कार्यकर्ता नसुध्रिएको भन्दै जेन-जीहरुले 'एक्सपोज झोले' ट्रेन्ड सुरु गरेका छन् ।

उनिहरुले दलका कार्यकर्ताहरूको तस्बिर र भिडियो टिकटक र रेडिट लगायतका सामाजिक सञ्जालमा पोस्ट गर्दै यो 'ट्रेन्ड' सुरु गरेका हुन् । 

जेन-जी आन्दोलनअघि सामाजिक सञ्जालमा 'नेपो बेबी ट्रेन्ड' चलेको थियो  । 'एक्सपोज झोले' ट्रेन्डमार्फत जेन-जीहरुले दलका बफादार कार्यकर्ताहरुको खिसिट्युरी गरिरहेका छन् । उनीहरुले कार्यकर्ताले शीर्ष नेताहरुसँग खिचेका र पार्टीको झन्डा बोकेका तस्बिर र भिडियो 'फ्लेक्स' गरिरहेका छन् ।

कसरी सुरु भयो यो ट्रेन्ड?

जेन-जी आन्दोलनको बलमा सत्ता परिवर्तन भएको पृष्ठभूमिमा जेन-जीहरुले यो ट्रेन्ड सुरु गरेका हुन् । आन्दोलनका क्रममा राज्यले गरेको क्रुर व्यवहार, दर्जनौं आन्दोलनकारीको मृत्यु र घाइते हुँदा पनि पुराना दलका कार्यकर्ताहरुले आत्मालोचना नगरेको भन्दै जेन-जीले 'एक्सपोज झोले' अभियान सुरु गरेका हुन् । 

आन्दोलनपछि पनि कार्यकर्ता सुध्रिन नसकेको र उनीहरुले उल्टै शीर्ष नेताहरुको बचाउ गरेको भन्दै उनीहरुलाई 'झोले' भनेर व्यंग्य गरिएको छ । यो अभियानमा कांग्रेस, एमाले र माओवादीका कार्यकर्ताहरुको तस्बिर र भिडियो धेरै पोस्ट भएको देखिन्छ । राप्रपा र रास्वपाका नेता तथा कार्यकर्ताको तस्बिर पनि यो अभियानमा प्रयोग भएका छन् ।