काठमाडौँ — दुई सय बढी म्यानमारी नागरिक नेपाली पासपोर्टमा साउदी अरब पुगेको खुलासा भएको छ । उनीहरू हाल साउदी जेलमा छन् । जेलमा रहेका म्यानमारका नागरिकलाई नेपाल लैजान साउदी प्रशासनले नेपाली दूतावासमाथि दबाब बढाए पछि उनीहरूले हस्तलिखित नेपाली राहदानी प्रयोग गरेको खुलेको हो ।

साउदीका लागि नेपाली राजदूत नरेशविक्रम ढकालले बुधबार राजदूतहरूको बैठकमा यो विषयमा जानकारी गराएका छन् । भिजिट भिसामा देखिएको समस्याबारे छलफल गर्न परराष्ट्र मन्त्रालयको समन्वयमा अध्यागमन विभागले ९ वटा मुलुकका राजदूत, श्रम काउन्सिलर र श्रम सहचारीको बैठक राखेको थियो ।

‘लामो समयदेखि साउदीको जेद्दास्थित जेलमा म्यानमारका नागरिक छन्, उनीहरूले हस्तलिखित नेपाली राहदानी प्रयोग गरेका रहेछन्,’ ढकालको भनाइ उद्धृत गर्दै बैठकमा सहभागी एक राजदूत भन्छन्, ‘उनीहरूसँग भिसा नभएपछि साउदीले पक्राउ गरेर राखेको छ, केहीलाई हाजिर जमानतमा छाडेको छ । उनीहरुलाई नेपाल पठाउनका लागि सहजीकरण गर्न हामीलाई साउदीले भनेपछि यो घटनाबारे जानकारीमा आएको हो ।’

परराष्ट्र मन्त्रालयले यसबारे अनुसन्धान गर्ने जनाएको छ । ‘कुन राहदानी कहाँबाट र कहिले जारी भएको भन्ने अपडेट विवरण मागेका छौं,’ परराष्ट्र प्रवक्ता लोकबहादुर पौडेल क्षेत्रीले कान्तिपुरसँग भने, ‘विवरण आइसकेपछि मात्र थप भन्न सकिन्छ ।’

नेपाली राहदानी लिएकाहरु सन् २०१४ अघि नै साउदी पुगेको देखिन्छ । कान्तिपुरलाई प्राप्त विवरणअनुसार दुई सय जनामध्ये कृष्णबहादुर श्रेष्ठ नामको राहदानी वाहक ५ अगस्ट २०१४ मा साउदीको सार्को कम्पनीमा काम गर्न गएको देखिन्छ । त्यस्तै अनिल लिम्बू नाम गरेको राहदानी वाहक ४ जुलाई २००९ मा साउदी अरब गएको देखिन्छ । बाबुराम खड्का ७ मे २०११ मा गएको देखिन्छ । जासिर शेख ९ जुन २००७ मै गएको देखिन्छ । उनीहरूले राहदानीको म्याद भएको समयसम्म भिसा थप्दै बसेका रहेछन् । म्याद सकिएपछि कागजातविहीन हैसियतमा अनधिकृत रुपमा बस्दै आएको देखिन्छ ।