गोरखकालीको दसैंघरमा एक पाथी र गोरखनाथ मन्दिरमा एक पाथी जौको जमरा राखिएको छ
गोरखा — नवरात्रको पहिलो दिन सोमबार गोरखा दरबारस्थित दसैंघरमा विधिपूर्वक जमरा राखिएको छ । बिहान ९ बजेर १३ मिनेटको साइतमा विधिपूर्वक जमरा राखिएको गोरखा दरबारका कर्मचारी हरि सारूले बताए । गोरखकालीको दसैंघरमा एक पाथी र गोरखनाथ मन्दिरमा एक पाथी जौको जमरा राखिएको उनले बताए ।
तल्लो कोट र उपल्लो कोटमा पनि ९.१३ को साइतमा जमरा राखिएको छ । गोरखा दरबारमा जमरा राख्ने साइतमा स्थानीयहरूले पनि घर/घरमा जमरा राख्ने प्रचलन रहँदै आएको छ । जमरा राख्नुपूर्व सोमबार बिहान गोरखकाली भगवतीलाई कैलाशकोठाबाट गर्भगृह (दसैंघर)मा सवारी गराइएको थियो ।
झिसमिसे उज्यालोमा भगवती सवारी गर्ने प्रचलन रहँदै आएको छ । भगवतीलाई विजयादशमीको दिन गोरखा दरबारमै रहेको कन्ये कोठामा लगेर राखिने पूर्णिमाको दिन पुन: कैलाश कोठामा लगेर राखिने पनि उनले बताए । नवरात्रभर गोरखा दरबारमा विशेष पूजा हुने गर्छ ।
